Berisha: Bin Ladenët kanë marrë ndëshkimin më të merituar

Kryeministri i Shqipërisë Sali Berisha ka përkujtuar sot 10-vjetorin e sulmeve terroriste në Shtetet e Bashkuara të Amerikës.

Sot familjet e viktimave, kombi i madh amerikan, miqtë e tyre të lirisë në mbarë botën, përulen me nderim të thellë në kujtim të mijëra burrave dhe grave, djemve dhe vajzave, fëmijëve e të moshuarve që humbën jetën 10 vjet më parë nga sulmi barbar terrorist në New York, Washington dhe ne Pensilvani thekson në deklaratën e tij kryeministri Berisha.

Më tej shefi i qeverisë shqiptare thekson se me këtë akt terrorist i cili është më mizori në historinë e kohërave, ideatorët dhe ekzekutorët e tij besonin se do të mund të përkulnin flamurin amerikan por pas 10 vitesh ky flamur valëvitet më lart se kurrë.

Sot, pas 10 vitesh, familjet e atyre që humbën jetën nga ky sulm, qytetarët e SHBA, miqtë e tyre në mbarë botën, kujtojnë këtë datë dhe nderojnë kujtimin e viktimave të 11 shtatorit pasi ideatorët, sponsorët, mbështetësit, organizatorët e tyre, Sudanët e Bin Ladenët dhe të tjerë të ngjashëm me ta, kanë marrë ndëshkimin më të merituar thekson më tej Berisha.

Më tej kryeministri thekson se Shqipëria dhe shqiptarët, por dhe vendet e lira në tërësi, u janë mirënjohës qeverisë së SHBA dhe kombit amerikan për udhëheqjen e vendosur të luftës kundër terrorizmit botëror dhe arritjet historike në këtë luftë.

Shqipëria dhe shqiptarët ndihen krenarë se qëndrojnë të rreshtuar me mikun e tyre të madh në mbështetje të kësaj lufte gjatë këtyre 18 viteve duke dhënë kontributin e tyre modest në rezultatet e saj ka përfunduar kryeministri ndërsa ka shtuar se 11 Shtatori është një apel për të gjithë njerëzit e lirë për një qëndrim të vendosur ndaj urrejtjes, intolerancës dhe fanatizmit të çdo lloji e të çdo ngjyre.