Berisha: Do plotësojmë detyrimet për klimën

Kryeministri Sali Berisha ka mbajtur një fjalim sot në samitin e klimës në Kopenhagen.
Kreu i qeverisë u shpreh se qeveria shqiptare i konsideron ndryshimet klimatike si një prej kërcënimeve më serioze me të cilën përballet planeti ynë dhe një prej çështjeve më komplekse që duhet trajtuar me vendosmëri dhe efikasitet. Numri 1 i qeverisë shqiptare pohoi se Shqipëria është e gatshme të plotësojë detyrimet për klimën.

Berisha theksoi se qeveria shqiptare ka integruar në Strategjinë e saj të Zhvillimit Kombëtar parimin e zhvillimit te qëndrueshëm, si dhe nxitjen e teknologjive të gjelbra duke synuar drejt një ekonomie pa karbon. "Si një vend që është në procesin e integrimit në bashkimin Evropian, gjithë zhvillimi industrial dhe aktiviteti ekonomik i vendit po realizohet nën rregulla të rrepta ligjore, miqësore me mjedisin dhe konform normave dhe standardeve të BE-së", u shpreh kryeministri.

Kreu i qeverisë deklaroi se Shqipëria mbetet e gatshme të kontribuoje në përpjekjet kundër ndryshimit të klimës dhe për të vënë në jetë vendimet e këtij samiti te rëndësishëm.

Kreu i qeverisë u nis një ditë më parë në Danimarkë dhe do të qendrojë deri në mbyllje të samitit. Gjatë qëndrimit atje, Berisha është i ftuar në një darkë që shtrohet për nder të pjesëmarrësve nga mbretëresha e Danimarkës, Madhëria e Saj Mbretëresha Margrethe II. Gjithashtu, Berisha është i ftuar edhe në një drekë të shtruar nga kryeministri danez së bashku me kryetarët e tjerë të qeverive dhe delegacioneve pjesëmarrëse në këtë konference.
Gjatë këtyre ditëve, kryeministri do të zhvillojë një seri takimesh bilaterale me liderë të rajonit dhe evropianë.