Berisha: “Edi Ramës do t’i mbetet në fyt aleanca e ngjalave”

Berisha inauguron në Fier, rikonstruksionin e rrugës, Meto Asim-Kafaraj: “2 vitet e para të mandatit të ardhshëm, përfundon e gjithë infrastruktura rrugore”

Kryeministri Sali Berisha inauguroi sot në Qarkun e Fierit, përfundimin e rikonstruksionit të rrugës Meto Asim-Kafaraj, investim me vlerë 247 milionë lekë. Pas ceremonisë së inaugurimit, Berisha zhvilloi edhe një takim me banorë të zonës, ku prezantoi projektet e qeverisë për katër vjeçarin e ardhshëm me fokus përfundimin e investimeve në infrastrukturën rrugore, punësimin, zhvillimin ekonomik dhe integrimin e Shqipërisë në BE. Ai premtoi asfaltimin e të gjitha rrugëve brenda dy viteve të mandatit të ardhshëm qeverisës. “Sot pas 8 vitesh kemi ndërtuar mijëra km rrugë ndërsa 60 % e investimeve ka shkuar për Shqipërinë rurale. Kemi asfaltuar 8000 km rrugë dhe brenda dy viteve të para të mandatit të ardhshëm përfundojmë  të gjitha rrugët.  Ne sot inagurojmë rindërstimin e plotë të rrugës Meto Asim-Kafaraj në komunën Frakull, rrugë që lidh këtë komunë me me superstradën Levan-Damës. Kemi ndërtuar mbi 1000 shkolla, qindra ujësjellësa ,4 vitet që vijnë do ndërtojmë infrastukturën më moderne. Kemi bërë gjithçka për të parandaluar korrupsionin.Do japim fonde për projektet tuaja,nuk kemi bërë diferencime politike në shpërndarjen e granteve.  Paketa e re fiskale do rrise fitimet e fermerëve, do hiqet taksa e fermerëve që blejnë tokë. Ne kemi punuar në këto katër vite dhe puna jonë është e dukshme në rrugë, shkolla etj”- u shpreh kryeministri. Gjithashtu, kryeministri Berisha sulmoi opozitën, që sipas tij mohon investimet evidente të qeverisë në këto 8 vite. Sipas kryeministrit Berisha, qeveria prezanton Shqipërinë reale, ndërsa opozita Shqipërinë e gënjeshtërt. “Pushtetin opozitar e ka mbuluar errësira, po mohon çdo investim në këto 8 vite”- u shpreh kryeministri. Gjithashtu, po nga Fieri, kryeministri Berisha komentoi dhe koalicionin opozitar, PS-LSI. Sipas tij, “mes PS dhe LSI, nuk ekziston asgjë veç errësirës për pushtet, të cilin nuk do ta shijojnë. Edi Rama kudo që shkon tregon se nuk është vetëvetja”, tha kryeministri, duke theksuar se, kreut të opozitës do t’i mbetet në fyt aleanca e ngjalave”. Rruga, me gjatësi 8.5 kilometër, që është financim i qeverisë shqiptare, BERZH dhe BEI, me vlerë 238 milionë lekë. Kjo rruge lidh 5 fshatra të komunave Frakull dhe Levan me njëra – tjetrën, por edhe me luginën e Vjosës dhe autostradën Levan – Tepelenë. Segmenti i ri rrugor Meto Asim – Kafaraj është i pajisur me të gjithë elementët e nevojshëm të infrastrukturës. Fermerët e kësaj zone, të njohur për prodhimin bujqësor dhe blegtoral, do të kenë mundësi të shesin produktet e tyre jo vetëm në tregun e Fierit, por edhe në tregun e Vlorës. Ky investim shkurton kohën e udhëtimit 3 herë krahasuar me atë përpara rikontruksionit të rrugës, duke lehtësuar gjithashtu lidhjen me qendrat administrative, shërbimet arsimore dhe ato shëndetësore. Me këtë investim, infrastrukturës rrugore të rrethit të Fierit i shtohet edhe një unazë që lidh rrugën Cakran – Qafë e Koshovicës me autostradën Levan – Tepelenë, duke i dhënë më shumë frymëmarrje lëvizshmërisë së mjeteve drejt Vlorës dhe Tepelenës.