Berisha: Në OKB do të jemi dy shtete shqiptare

Nju Jork, 22 shtator 2011, NOA – Kryeministri i Shqipërisë, Sali Berisha deklaroi se shumë shpejt në OKB do të jenë dy shtete shqiptare anëtare me të drejtë vote.
Kryeministri Berisha bëri me dije se po lobon për njohjen e shtetit të Kosovës, e cila do t’i mundësonte anëtarësimin në OKB dhe organizata tjera relevante ndërkombëtare.
Duke folur në një intervistë për agjencinë e lajmeve INA, shefi i ekzekutivit shqiptar theksoi se Sot Kosova është një vend që ëndrrën e saj e ka bërë realitet dhe kjo është një nga ëndrrat e gjithë kombit shqiptar, që sot e shohim Kosovën të lirë dhe të pavarur.
Zoti Berisha vlerësoi faktin se vizioni i Kosovës për të ardhmen është një mundësi shumë e madhe.
Sipas tij, në diskutimet e sesionit vjeshtor të Asamblesë së Përgjithshme të OKB-së po lobon për njohjen e Kosovës.
Ne kemi shfrytëzuar takimet tona që të lobojmë edhe për Kosovën, njohjen e saj nga shtetet që nuk e kanë njohur ende ose hezitojnë ta njohin atë, shtoi ai.
Kryeministri Berisha foli në këtë intervistë edhe për takimin e përzemërt me presidentin amerikan Barack Obama, ish-presidentin Bill Klinton, zhvillimin e hovshëm ekonomik të Shqipërisë, për diasporën shqiptare etj.
INA/NOA