Berisha: Presidenti Topi është palë me Ramën. Basha edhe drekën e ha në bashki

Ndërsa ka mbajtur një konferencë për Kosovën, kryeministri Berisha iu është përgjigjur pyetjeve të gazetarëve për situatën politike në vend.

Pyetjes se a do të ketë ndryshime kushtetuese, Berisha i është përgjigjur se nuk ka arsye që të ketë, sepse ndryshimet për presidentin nuk do të kishin vlerë, pasi sipas tij, opozita tashmë e ka presidentin.

Sipas Berishës, Topi është mbështetës i Ramës dhe këtë e tregoi me votimin në zgjedhjet e 8 majit.

Oferta ime është zbatimi dhe respektimi i Kushtetutës. Unë nuk e bëj këtë për interesin e mazhorancës apo të qeverisë, por e bëj këtë për interesin jetik të çdo qytetari shqiptar, respektimi i Kushtetutës së vendit. Ju e shihni se z. Rama e pati Presidentin. Presidenti votoi për të, kjo u faktua me votë. Unë dua të theksoj këtu se janë jo të paktë ata që më thonë, a ndiheni i tradhtuar nga ky veprim. Absolutisht, nuk ndihem aspak i tradhtuar, sepse duhet të jeni të bindur se thelbi i përpjekjeve të jetës sime ka qenë që njerëzit të votojnë të lirë. Këtë ideal nuk mund të ma errësojë as edhe një interes tjetër i ngushtë. Jo! Njerëzit do të votojnë për atë që duan. Zoti Rama e pati Presidentin me mish e me shpirt, sepse ai që të jep votën të jep shpirtin e tij politik, ai firmos për ty, me vullnetin e tij politik. Dhe çfarë i solli kjo? 140 mijë vota më pak në rang vendi, 10.999 vota më pak në Tiranë. Sepse në fund të fundit, secili këtu, në një vend të lirë, ka vetëm një votë. Zoti Rama e ka të vështirë të nxjerrë mësime. A mund të më thoni; kush duhet të prevalojë, të mbizotërojë: flirtet, prapashpinëzat, apo Kushtetuta. Sigurisht do të mbizotërojë Kushtetuta. Këta që pendohen bëjnë mirë që pendohen, por kur të takon shumë herë të pendohesh, kthehesh në pendesë. Duhet ta kuptojmë këtë, ka thënë Berisha.

Ky i fundit ka folur edhe për të ardhmen e Bashës në PD, duke thënë se ai tashmë është më shumë i angazhuar për qytetarët e Tiranës. Madje, sipas Berishës, Basha është aq i angazhuar për bashkinë, sa dhe drekën e ha në zyrë.

Partia Demokratike është një parti e hapur dhe postet e saj, përfshi edhe postin e kryetarit, në Kongres, janë të hapur për të gjithë anëtarët e vet. Por, dua të jem i sinqertë me ju. Me sa po kuptoj unë, preokupimi më kryesor i kryetarit të Bashkisë janë qytetarët e Tiranës.  Më thonë se ai dhe drekën e ha në zyrën e tij, pasi dëshiron që ti përkushtohet tërësisht Tiranës. Por ai i ka të hapura të gjitha opsionet, tha Berisha.

Kryeministri tha se do zgjedhë nënkryetarët e sekretarët e PD pasi të kthehen nga pushimet.

“Brenda PD-së ka pasur, ka dhe do të ketë gjithnjë debat të hapur dhe garë të garantuar. Sapo të mbyllen përfundimisht këto zgjedhje që është data 30 në mos gaboj dhe, sapo të rikthehen edhe njerëzit me pushime, sepse njerëzit janë me pushime sepse është kohë pushimesh, do të mblidhet kryesia, do të mblidhet sërish Këshilli Kombëtar dhe do të procedohet me të gjitha zgjedhjet e strukturave. Debate ka dhe duhet të ketë, është normale. PD është një parti demokratike, që do të thonë definicion i mendimit të lirë,” tha Berisha.