Berisha në komunën Pustec: Rruga afron Shqipërinë me Maqedoninë

Kryeministri Berisha ka vijuar sot me turin e inagurimeve në të gjithë vendin.

Paditen e sotme kreu i qeverisë ka inaguruar rrugën në komunën Pustec në Korçë për të cilën theksoi se kjo ka një rëndësi shumë të madhe  jo vetëm për banorët e kësaj komune por edhe për Korçën, Shqipërinë dhe për turistët që  vizitojnë Prespën si një nga perlat më të bukura të natyrës shqiptare, ballkanike dhe më gjerë.

Sipas kryeministrit kjo rrugë ka një rëndësi të madhe pasi lidh Shqipërinë me Maqedoninë.

“Rruga shkurton tre herë distancën e fshatit me Korçën, distancën e Korçës me Prespën, distancën e turistëve që vizitojnë Prespën. Rruga përmbush premtimin tonë për lidhjen e komunave me akset kombëtare. Por kjo rrugë ka në rëndësi të veçantë pasi bashkon dy vendet tona mike, Shqipëria dhe Maqedonia. Unë i garantoj pakicës maqedonase se politika ime mbetet bashkëpunimi miqësor në të gjtiha fushat me vendin mik, në interesin e të dyja vendeve, kombeve dhe të rajonit në tërësi tha Berisha.

Ndërsa u kërkoi qytetarëve të votojnë Partinë Demokratike, kryeministri Berisha nuk la pa sulmuar edhe kryesocialistin Rama që sipas tij ka penguar marrjen e statusit duke mos votuar 3 ligjet e kërkuara nga Brukseli.

“Këto tre ligje mbajnë peng statusin e vendit kandidat me të cilin ju do të përfitoni, Prespa do të kishte qindra mijëra turistë më shumë, fermerët subvensionet shumë herë më të mëdha. Shqipëria do të përfitonte dhe çdo qytetar qindra milionë euro investime të cilat do të transformonin më tej infrastrukturën tonë. Por demokracia funksionon në Shqipëri. 23 qershori po afron dhe jam i bindur që shqiptarët me mençuri do të votojnë për forcën që u provua gjithë këto vite si lokomotivë e vërtetë zhvillimi. Do të votojnë ndaj atyre që shndërruan në realitet premtimin e tyre, do të votojnë për Partinë Demokratike e cila programin e saj e ka të drejtuar te familja, te liria e individit, tek respekti i ndërsjelltë. Ndaj dhe ju ftoj ju që të gjithë shqiptarët që ta shndërrojmë këtë fushatë në fushatën më të bukur, të punojmë së bashku për vizionin e shkëlqyer të 4 viteve që do të vijnë. Ne jemi ndryshimi përpara ka theksuar më tej kryeministri.

Kreu i qeverisë theksoi më tej se Partia Demokratike po shkon drejt fushatës elektorale me premtime të mbajtura në ndryshim nga alternativa tjetër e cila sipas tij ka vetëm bllokimin dhe bojkotin.