Berisha niset për vizitë zyrtare në Izrael

Me ftesë të homologut Benjamin Netanyahu, kryeministri Berisha u nis ditën e sotme për një vizitë zyrtare tre-ditore në Izrael.

Sipas faqes zyrtare të Kryeministrisë, kjo vizitë do të kontribuojë në çuarjen përpara të marrëdhënieve bilaterale si dhe nxitjen e bashkëpunimit ekonomik mes dy vendeve. Berisha do të ketë bisedime me autoritetet më të larta në Jeruzalem, si dhe takime me komunitetin e biznesit izraelit, në Tel Aviv.

Delegacionin e kryeministrit e shoqëron edhe një grup përfaqësuesish të biznesit shqiptar dhe  të medias.

Një moment i veçantë i vizitës për kryeministrin Berisha, do të jetë edhe ceremonia e dhënies së titullit Anëtar nderi, nga Shoqata Shqiptaro-Hebraike.