“Besëlidhja e Shkodrës”, kontratë europiane e Shqipërisë

Arben Rrozhani

Drejtuesit kryesorë të të majtës shqiptare nënshkruan dje në Shkodër të ashtuquajturën “Kartë të parimeve të bashkimit PS-LSI”, në emër të Aleancës për  Shqipërinë Europiane, koalicionit qeverisës të ven-dit, pas fitores së zgjedhjeve të 23 qershorit 2013.  Në një ceremoni solemne me “dëshmitarë” socialistët europianë, kryetari i PS-së, Edi Rama dhe  kryetari i LSI-së, Ilir Meta, bënë zyrtare aleancën  e shpallur në 1 prill për të qenë së bashku jo  vetëm në zgjedhje, por edhe në bashkëqeverisje,  jo vetëm për një mandat, por për dy, me synim  anëtarësimin e vendit në BE. Finalizimi i marrëveshjes është nisja e mbarë e një rruge të gjatë  që duhet të përshkruajë e majta e bashkuar, me  dhjetëra parti, për një rikthim të vendit në rrugën  drejt Europës, pas disa viteve vendnumëro, kursit  të rrezikshëm drejt një autokracie tipike lindore të  modelit azer dhe kapjen e “trenit” të Europës, ku  nuk kemi mundur të hipim, për shkak të një qeverisjeje antieuropiane në vlera dhe reforma.  Përtej një “besëlidhjeje” mes dy liderëve të të majtës,  Karta e nënshkruar dje në Shkodër, është një kontratë  qeverisjeje që u ofrohet shqiptarëve të tradhtuar  nga mungesa e qeverisjes, braktisjes së popullit nga  një klan i ngushtë pushteti që ka përdorur Ekzekutivin, legjislativin dhe Gjyqësorin për të privatizuar  vendin dhe për ta shndërruar atë në një çiflig-shtet.  Në këtë kontratë afatgjatë me shqiptarët, dy partitë  kryesore të të majtës bien dakord që të përafrojnë  programet elektorale dhe politike për të qenë në  një mendje me reformat që duhet të bëjë qeverisja  e ardhshme e të majtës, me synim anëtarësimin e  vendit në BE, pas 23 viteve tranzicioni me shumë  “prapakthehu”. Qeverisja e ardhshme premton se nuk do të  përndjekë, intimidojë, kërcënojë, dënojë me gjyqe farsë, apo  vrasë opozitën, siç ka bërë PD-ja në gjatë dy mandateve të saj.  Kuvendi i ri, ku shumicë do të jetë  e majta, nuk do të jetë masha në  duart e qeverisë për të mbajtur  në zap institucionet e pavarura  kushtetuese, duke i kthyer ato në  vegla të partisë-shtet, duke fryrë  administratën shtetërore me militantë që duhen  për vota dhe për mitingje dhe aspak në shërbim  të qytetarit, siç ka bërë qeverisja në këto tetë vite.  Qeverisja e re premton se nuk do të jetë streha e  pandëshkueshmërisë dhe e bunkerit të informacionit që duan të dinë taksapaguesit për paratë që  ata paguajnë për të mbajtur në këmbë për qeveri-në; se Ekzekutivi nuk do të jetë një shitës asetesh,  koncesionesh, pasurish dhe të të mirave të tjera  materiale të vendit nga një grusht njerëzish të lidhur me kryeministrin, që veprojnë të pavarur dhe  që nuk guxon t’i kontrollojë dhe t’u kërkojë llogari  askush. Qeveria e re do të nxjerrë nga skamja  atë shtresë të madhe shqiptarësh që sot vetëm  mbush listat e ushqimeve veresie dhe mbijeton larg kujdesit shtetëror;  se do të rikthejë shtresën e  mesme që u zhduk në këto  vite të qeverisjes së djathtë,  duke e shndërruar në të var-fër, përmes barrës së rëndë  fiskale, rritjes së çmimeve dhe  uljes së fuqisë blerëse. Biznesi  i madh, ai që i jep punë mijëra  të punësuarve dhe të ardhurat kryesore në buxhetin  e shtetit, nuk do të jetë viktimë e politikës klienteliste të qeverisë, apo taksidarëve të tatim-taksave që mbushin me dhunë  buxhetin e rrënuar nga keqmenaxhimi.  Shqiptarët do të kenë pronën e tyre të trashëguar,  apo të ndërtuar ndër vite dhe për këtë, nuk do të  vendosë më qeveria; as do të luajë kartën e legalizimeve që nuk ua zgjidh realisht pronësinë, por që  përdoret si kartë elektorale në çdo prag fushate.  Në vendin ku ndodhin aktualisht mbi 20 mijë krime  në një vit, shumica ndaj pronës dhe personit, qeverisja e ardhshme premton rikthimin e sigurisë dhe  të ligjshmërisë, ku nuk fiton më i forti, por vetëm  ligji dhe të drejta kushtetuese. Qeverisja e re nuk  do të përdorë rininë vetëm si fasadë për mitingjet  elektorale, apo ilustrimin e “Shqipërisë digjitale”,  që ekziston vetëm në qendër të Tiranës, por rikthimin e saj në auditore dhe në punë, si kontribuese  dhe përfituese të mirëqenies.  Në vendin ku vetëm administrim territori qeveritar,  ku gjithkush mund të bëjë çfarë të dojë dhe ku të  dojë me pronën publike, qeverisja e re premton të  rivendosë ligjin, duke e nxjerrë Shqipërinë nga harta  e vendeve-plehra dhe ku deri më sot ka fituar paligjshmëria dhe kaosi urban dhe mjedisor.  Kontrata programore dhe politike PS-LSI, premton se do të jetë afatgjatë dhe me destinacionin e dëshiruar, për të cilin mijëra studentë dhe  profesorë, mes të cilëve dhe Edi Rama dhe Ilir  Meta dolën në shesh në dhjetor ’90, duke thirrur:  “E duam Shqipërinë si gjithë Europa”. Kjo është  kontrata qeverisëse që u ofrohet shqiptarëve për  23 qershorin 2013 dhe ata do ta kenë të lehtë  të bëjnë dallimin mes 8 vitet e premtuara dhe të  parealizuara nga qeverisja e PD-së me ato që e  majta e bashkuar u ofron shqiptarëve si një rrugë  e vetme për të shpëtuar vendin.