Beteja për titull
Të mërkurën do të zhvillohet xhiroja e parafundit e Superligës së Kosovës në futboll. Super-derbi i kësaj jave do të zhvillohet në stadiumin ‘Riza Lushta’ në Mitrovicë, ku do të ballafaqohen dy rivalët kryesorë për titull të kampionit – Trepça ’89 dhe Prishtina.
Në fakt, skuadra prishtinase prin në tabelën e klasifikimit me 62 pikë, katër më shumë sesa ekipi mitrovicas. Kështu, bardhekaltërve do t’u mjaftonte edhe një barazim si mysafirë të 89-shit për ta siguruar edhe matematikisht titullin e kampionit – një xhiro para përfundimit të kampionatit.
Andaj, kryeqytetasit shpresojnë që midis Mitrovicës ta kremtojnë titullin e kampionit për nder të 90 vjetorit të themelimit të klubit të tyre.
“Edhe pse jemi katër pikë para Trepçës ’89, në këtë derbi do të hyjmë të koncentruar dhe duhet të angazhohemi shumë për ta nxjerrë një rezultat pozitiv, për ta siguruar titullin e kampionit”, deklaroi për Express trajneri i Prishtinës, Jusuf Tortoshi.
Në anën tjetër, ‘Xehetarët’ vetëm me fitore ndaj Prishtinës do të mund të shpresojnë që në xhiron e fundit të ndodhë mrekullia dhe ta rrëmbejnë epitetin e më të mirit.
Prandaj, ata thonë se do ta japin maksimumin në këtë duel, të paktën për t’ia shtyrë festën kryeqytetit. Madje, mitrovicasit thonë se do të përpiqen ta mposhtin Prishtinën për të dëshmuar se e kanë merituar më shumë sesa ajo titullin e kampionit.
“Do ta kemi shumë vështirë, por kualiteti është në anën tonë. Do të mundohemi të shënojmë fitore për të dëshmuar se jemi ekipi më i mirë dhe se shkaku i dallavereve të skuadrave tjera na u është mohuar titulli. Do të tregojmë se ndershëm kemi arritur deri këtu, në dallim prej ekipeve tjera”, tha sulmuesi i Trepçës, aktualisht më i miri në Superligë, Berat Hyseni.
Superliga – Xhiroja e 32-të
E mërkurë
Trepça ’89 – Prishtina
Hysi – Trepça
Vëllaznimi – Drenica
Drita – Liria
Besa – Lepenci
E enjte
Gjilani – KEK-u
Të gjitha ndeshjet fillojnë në orën 17:00