Big-ët e Italisë dhe emrat që do vijnë në janar

Merkatoja në gadishullin Apenin është bërë e nxehtë dhe shtatë vendet e para duan të bëjnë meremetimet e messezonit për të synuar më pas sprintin final drejt titullit kampion

Thuajse gjysma e kampionatit italian ka përfunduar dhe Milani e Juventusi ndajnë vendin e parë në renditje me pikë të barbarta. Pas tyre është Udineze e Lacio, ndërsa Interi, i ringjallur pas serisë së fundit të fitoreve, do të kërkojë të tregojë se nuk është i mbaruar dhe se kërkon ta thotë fjalën e tij deri në fund. Napoli e Roma, që sezonin e fundit kanë qenë më në formë, këtë vit po heqin pak keq. Sidoqoftë, e justifikuar për të dyja skuadrat. Napoletanët kanë edhe barrën Champions mbi supe, ndërsa verdhekuqtë kanë ndryshuar komplet filozofinë e lojës së tyre me trajnerin Enrike që kërkon ta bëjë Romën si Barcelona.

Milani

“Djajtë” janë shumë të përqëndruar te marrëveshja me argjentinasin Karlos Tevez. Ata kanë vullnetin e plotë të lojtarit. Ndërkohë që emrat e tjerë janë Fernando Torres dhe Maksi Lopez. Sulmuesi i Katanias do të ishte objektivi i fundit. Duhet parë me kujdes edhe çështja e Filipo Inzagit, i cili dëshiron të largohet nëse nuk do të futej në listën e Champions League. Më pas janë edhe mundësitë e minutave të fundit, siç ndodhi në verë me Antonio Noçerinon.

Juventusi

Drejtuesit po punojnë me një strategji në funksion të projektit. Marota ka bllokuar mbrojtësin Kaseres të Seviljes. Për pas ata po synojnë edhe sulmuesin Borrielo nga Roma, ndonëse tifozët janë të pakënaqur me ish-lojtarin e Milanit. Sidoqoftë, gjithçka do të bëhet pas shitjeve të Amaurit, Iakuintës dhe Tonit.

Udineze

Krerët e Udinezes po mundohen për të bërë një goditje në mesin e fushës të formacionit të drejtuar nga Guidolin. Gjithmonë nuk bëhet fjalë për një lëvizje me shpenzime të mëdha. Emri mund të jetë ai i Kevin Anin i Soshosë, që pëlqehet shumë nga bardhezinjtë friulianë.

Lacio

Igli Tare po kujdeset për çështjen Sise, i cili në fund mund të qëndrojë në Romë, ndonëse ka bërë gati valixhet për një rikthim të mundshëm në vendlindje. Ndërkohë në mesin e fushës pëlqehet shumë Haris Medunjanin i Makabit Tel Aviv.

Interi

Në radhët e zikaltërve ka një optimizëm të madh për mbrojtësin e qëndrës Huan të Internacional Porto Alegre. Edhe lojtari ka shprehur dëshirën e tij për të ardhur te skuadra e drejtuar nga Klaudio Ranieri. Ndërkohë që tani ka shumë mundësi që të vijë nga Fiorentina Huan Manuel Vargas në formë huazimi, të cilin Interi e ka joshur edhe në verë.

Napoli

Eduardo Vargas është një lojtar i Napolit. Por firma e vërtetë është ajo e trajnerit Maxrri që ka deklaruar se nuk ka ndërmend që të japë dorëheqjen. Maxarri do të ketë edhe një sulmues në dispozicion. Ndërkohë që po mendohet edhe për mesfushorin ganez të Interit, Sulejman Muntari.

Roma

Projekti i spanjollit Luis Enrikue vazhdon të ecë përpara dhe në janar diçka mund të lëvizë. Fillimisht duhet rinovuar kontrata e De Rosit dhe Grekos. Më pas mendohet për mbrojtësin e Sampdorias Gastaldelo. Për mesin e fushës flitet për Azpokuleta të Olimpik Marsejës. Përsa u përket largimeve, thuajse i sigurt transferimi i Borrielos te Juventusi.

Sa shumë yje në merkato

Merkatoja e janarit është vetëm një javë larg hapjes. Shumë klube europiane tashmë kanë identifikuar objektivat e tyre për përforcime gjatë këtij dimri. Faqja italiane calciomercato.com ka formuar një listë me emrat e disa futbollistëve të mirënjohur të cilët do të jenë të lirë të negociojnë me klubet e interesuara, pasi kontratat e tyre skadojnë në fund të këtij sezoni.

Lojtari Skuadra

Kristian Kivu Inter

Daglas Tvente

Alesandro Nesta Milan

Alan Xagoev CSKA Moskë

Daniele De Rosi Roma

Pablo Aimar Benfika

Florent Maluda Çelsi

Dimitar Berbatov Mançester Junajtid

Raul Gonzales Shalke

Didie Drogba Çelsi

Flavio Roma Milan

Marko Kaseti Roma

Valter Samuel Inter

Rikardo Montolivo Fiorentina

Tomas Roziçki Arsenal

Trankuilo Barneta Bajer Leverkusen

Nikolas Lodeiro Ajaks

Matjë Flamini Milan

Mladen Petriç Hamburg

Andrej Arshavin Arsenal

Ederson Olimpik Lion

Salomon Kalu Çelsi

Xheferson Farfan Shalke

Filipo Inzaghi Milan

Klarens Sedorf Milan

Alesandro Del Piero Juventus