Bisedimet, Tahiri: Pala serbe e paangazhuar

Shefja e delegacionit të Kosovës, Edita Tahiri, ka deklaruar se Kosova i ka plotësuar detyrimet në këto bisedime ndërsa ka theksuar se e kundërta ndodh me palën serbe e cila nuk është shumë e angazhuar.

“Serbia nuk ka pasur asnjëherë angazhim serioz që kur janë hapur bisedimet në mars. Ajo është e paangazhuar për të arritur marrëveshje si për menaxhimin e integruar të kufijve, ashtu edhe për çështjet e energjisë dhe telekomunikacionit” ka theksuar Tahiri.
 

Ajo ka theksuar se ka shumë dallime mes palëve për çështjen e menaxhimit të kufijve që sipas saj duhet të trajtohet në përputhje me standardet evropiane.
 

“Bisedimet kanë zgjatur deri në orët e vona. Ende ka diferenca mes palëve, nuk ka rezultate konkrete. Për sa i përket cështjes së menaxhimit të integruar të kufijve, mund të them se shteti i Kosovës ka dhënë mbështetjen, për një model europian, por gjatë dialogut merret përshtypja e të gjitha palëve. Është një proces kompleks ku do të shohim sa do të përparojmë”, ka thënë Tahiri ndërsa shtoi se Serbia duhet ta cilësojë Kosovën si shtet sovran.