Biznesi: Ulja e normës së interesit do lehtësojë kreditimin

Vendimi i Këshillit Mbikëqyrës së Bankës së Shqipërisë për uljen e normës bazë të interesit me 0.5 për qind është vlerësuar nga komuniteti i biznesit, ndonëse është konsideruar si një vendim i vonuar. Biznesi prodhues, duke përshëndetur vendimin e BSH-së, është në pritje që bankat e nivelit të dytë ta reflektojnë atë në lehtësimin e kreditimit për sipërmarrjet dhe industrinë e prodhimit në vend, si dhe gjithë komunitetin e gjerë të biznesit. Konfindustria bëri të ditur dje nëpërmjet një njoftimi për median se mbështet në parim vendimin e Bankës Qendrore për uljen e normës bazë të interesit me 0.5%, për të kaluar në 5.25%, megjithëse e vlerëson krahasimisht të vonuar në kohë. Konfindustria kërkon marrjen e veprimeve shoqëruese të nevojshme, me qëllim që të kemi përcjellje të rrjedhojave të vendimit në lehtësimin e prekshëm të kredidhënies për biznesin dhe qytetarët. Biznesi prodhues kërkon njëkohësisht nga Banka e Shqipërisë, por edhe nga institucionet shtetërore financiare t’i kushtojnë rëndësi parësore edhe shmangies të rrjedhojave negative, që mund të vijnë nga vendimi për uljen e normës bazë të interesit. Sipas Konfindustrisë, Banka e Shqipërisë duhet të marrë masa për ruajtur zhvleftësimin e mëtejshëm të monedhës kombëtare nga veprimet spekulative me motiv psikologjik në tregun e parasë, si dhe nga ndërhyrjet e gabuara dhe të panevojshme të politikës ndaj vlerës së monedhës kombëtare. Bazuar në të dhënat zyrtare, leku është zhvleftësuar në mbi 13 %. Po kështu, një efekt tjetër negativ që mund të japë ndryshimi i normës së interesit dhe për të cilin përsëri Banka e Shqipërisë duhet të bëjë kujdes, është keqësimi i mëtejshëm i cilësisë së portofolit të kredive, që edhe në kushtet e tashmë ku mbi 16 % zënë kreditë e këqija, është rrezik i prekshëm për stabilitetin e sistemit bankar në vend. Domosdoshmëri mbetet përmirësimi urgjent i cilësisë së menaxhimit nga bankat e nivelit të dytë, deri më sot në shkallë të ulët dhe të papranueshme. Konfindustria vlerëson se shenjat e përmirësimit të ekonomisë botërore dhe qëndrueshmëria relative e sistemit bankar dhe ekonomisë shqiptare, përligjin në thelb uljen e normës bazë të interesit. Dy ditë më parë, Banka e Shqipërisë vendosi të ulë normën bazë të interesit të lekut. Guvernatori i Bankës së Shqipërisë tha se vendimi i fundit i Këshillit Mbikëqyrës përkthehet në një stimul për zhvillimin e ekonominë shqiptare, pasi tenton të nxisë huamarrjen nëpërmjet uljes së kostos së financimit. Nga ana tjetër, Guvernatori Fullani ftoi bankat e nivelit të dytë ta reflektojnë këtë vendim në aktivitetin e tyre, duke ulur interesat e kreditimit. Sipas tij, Këshilli Mbikëqyrës erdhi në këtë vendim, pasi analizoi në detaje zhvillimet më të fundit ekonomiko-financiare në vend, projeksionet makroekonomike, si dhe balancën e rreziqeve për muajt në vazhdim dhe vendosi të ulë me 0.5 pikë përqindjeje normën bazë të interesit. Këshilli Mbikëqyrës i Bankës së Shqipërisë ka arritur në përfundimin se tremujori i tretë i vitit 2009 është karakterizuar nga shenja pozitive në ekonomi dhe në tregjet financiare shqiptare të vendit. Fullani tha se perspektiva afatgjatë e zhvillimit të ekonomisë shqiptare mbetet pozitive. Sipas tij, qëndrueshmëria makroekonomike dhe besimi mbi sistemin financiar shqiptar, para së gjithash janë rrjedhojë e politikave tona të përgjegjshme makroekonomike dhe financiare të ndërmarra në vazhdimësi këto vitet e fundit. Stabiliteti makrofinanciar është një pikënisje e mirë për nxitjen e zhvillimit të vendit në periudhën e ardhshme. Duke argumentuar se në një masë të madhe, ky zhvillim do të varet nga aftësia e ekonomisë shqiptare për të tërhequr fonde, të cilat do të mbështesin rritjen e saj. Ai tha se ky vendim përbën një stimul të ri për zhvillimet ekonomike në vend, duke synuar një ulje të mëtejshme të kostos së financimit të ekonomisë.