Biznesmeni Augusto Blacker Miller u rekomandua nga Bafjar Zeqo - banon te kullat e Fidel Yllit

Këshilltarja e kryeministrit Suzana Guxholli

Këshilltarja për çështjet ekonomike e Kryeministrit Suzana Guxholli u përgjigjet akuzave të Partisë Socialiste, lidhur me “arrestimin” në Shqipëri të një ish-ministri peruan, aktualisht biznesmen. Lajmi i ditës në mediat e kontrolluara nga PS rezultoi një gënjeshtër e madhe, por kjo s’është e gjitha. Personi i pretenduar, Augusto Blacker Miller jo vetëm nuk është në kërkim ndërkombëtar, por rezulton të jetë mik i ngushtë i kryebashkiakut socialist të Fierit, Baftjar Zeqo dhe banon në bulevardin “Dëshmorët e Kombit”, te Kullat e Fidelit

Mediat pranë Ramës nxituan të shpërndajnë një lajm se, policia e Tiranë kish arrestuar ish-ministrin peruan Augusto Blacker Miller, që sipas tyre, ishte i shpallur në kërkim ndërkombëtar prej vitit 2009-ë. Gazetat dhe televizionet e kontrolluara nga kreu i PS-së, s’u mjaftuan veç me mashtrimin e arrestimit, por njëherazi po me aq nxitim e cilësuan si biznesmen që jetonte pranë selisë së Kryeministrisë. Fatkeqësisht kjo është edhe një e qeshur e madhe që flet shumë, më shumë se një akuzë me qëllim përbaltjen e qeverisë - pasi në thelb paralajmëron degradimin e Partisë Socialiste dhe rikthimin e saj në skutat e sigurimit komunist.
Zhurma e gramafonave të prishur nuk zgjati shumë, pasi faktet zbardhën se, Augusto Blacker Miller vërtetë jeton pranë selisë së Këshillit të Ministrave, por së pari jeton te Kullat Binjake të Fidel Yllit... Si dhe, përpara se të konsiderohet si një nga biznesmenët që ka përfituar lehtësira prej qeverisë (?), Augusto Blacker Miller është rekomanduar si investitor në Shqipëri nga krahu i djathtë i Edi Ramës, kryetari i bashkisë së Fierit, Baftjar Zeqo...
Fakte të mjaftueshme këto për të arritur në përfundimin se motoja e Partisë Socialiste “shpif, shpif se diçka do mbetet”, po i kthehet në autogol aksioneve të saj politike, pasi kuptueshëm dhe mirëfilltazi po përbalt veten.
Kësisoj, këshilltarja e kryeministrit Suzana Guxholli ishte dje në qendër të akuzave absurde të Partisë Socialiste, të cilave ajo iu përgjigj me dokumente dhe fakte konkrete. Guxholli, sqaron se adresimin për tek kryeministri të investitorit peruan, Miller e ka bërë kryetari i bashkisë së Fierit, Zeqo.
“Mediat e kontrolluara nga Edi Rama dhe ndonjë shpifës i paguar prej tij, mashtrojnë opinionin publik lidhur me arrestimin nga Policia e Tiranës të Manuel Augusto Blacker Miller, ish ministër i Jashtëm i Perusë i kërkuar nga Interpol. Ky veprim i Policisë së Tiranës hedh baltë si mbi zotin Rama dhe mediat e kontrolluara prej tij ashtu dhe mbi shpifësit e paguar që ai nxjerr. Kompania në fjalë në mënyrën me këmbëngulëse dhe të përsëritur është rekomanduar nga Kryetari socialist i Bashkisë së Fierit zoti Baftjar Zeqo, jo me një, por me disa letra drejtuar kryeministrit, por dhe me mesazhe SMS. Nëpërmjet letrave dhe mesazheve insistuese të vazhdueshme, kryetari socialist i Bashkisë së Fierit Baftjar Zeqo i kërkon kryeministrit mbështetje për projektin e kësaj kompanie. Zoti Zeqo thekson në letrat dhe mesazhet e tij se ka më se dy vjet që bashkëpunon në mënyrë të suksesshme me këtë kompani për realizimin e projektit të saj në qytetin e Fierit. Në këtë kuadër, pas kërkesës së drejtuar kryeministrit nga zoti Baftjar Zeqo dhe përfaqësues të kësaj kompanie, përfaqësues të saj janë pritur në takim nga këshilltarja e kryeministrit për çështjet ekonomike, Suzana Guxholli, rregull ky i pandryshuar në të gjitha kërkesat e autoriteteve vendore apo kompanive të biznesit, të cilët më pas drejtohen në institucionet përgjegjëse sipas fushave të projekteve”, thotë Guxholli.
Gjithashtu, ajo ka një përgjigje edhe për akuzën e radhës diletanteske se, Miller jeton pranë selisë së Këshillit të Ministrave. Në fakt, banesa e tij është tek kullat binjake të Fidelit.
“Duhet të kesh moralin e Edi Ramës që të shpifësh se qenka strehuar në Tiranë pranë Kryeministrisë ai që ndalohet nga autoritetet e policisë shqiptare. Madje theksoj se është e vërtetë që ai është strehuar në Tiranë, por nga Fideli i tij në Kullat Binjake pronë e deputetit të PS, Fidel Ylli”, përfundon reagimi i këshilltares për çështjet ekonomike e Kryeministrit Suzana Guxholli.