Biznesmeni nga Vitia rrahet në stacionin e policisë

Viti, 28 gusht - Si pasojë e një mosmarrëveshje lidhur me një kontest pronësor, Bahri Sahiti ka pasur një konflikt fillimisht verbal e pastaj edhe fizik me një inspektor komunal.  Që të dy më pas janë ndaluar në polici, por Bahri Sahitit i ka ndodhur diçka e pazakontë. Ai është rrahur brenda stacionit të policisë, por jo nga policët e këtij stacioni. Pasi është futur në një nga zyrat e policisë dhe është lënë vetëm nga policia, kanë arritur dy persona civilë, njëri nga të cilët e ka sulmuar dhe ia ka gjakosur hundët. Sahiti, thotë se është sulmuar nga dy truprojat e kryetarit të Komunës së Vitisë, Nexhmedin Arifi. Por policia e Vitisë ka pasur një rrëfim tjetër për këtë ngjarje. Fillimisht nëpërmjet një komunikate shtypi, policia ka thënë se viktima është sulmuar nga një i afërm i inspektorit komunal. Por më pas komandanti i stacionit, Afrim Halili, ka thënë se nuk e dinë se kush janë personat, të cilët kanë sulmuar Bahri Sahitin, ngase me procedurë të rregullt janë lëshuar nga arresti menjëherë. Por Bahri Sahiti është i bindur se ata janë truprojat e kryetarit të komunës dhe i identifikon me emra.
Policia ka pranuar se ky është një skandal, ngase një civil hyn në stacionin policor dhe rrah të arrestuarin.