Blutë me stërvitje të veçantë, fizioterapia në natyrë
Nga ANDI MATRAXHIU
Vazhdojnë kushtet skandaloze për një skuadër futbolli. Futbollistët e dëmtuar kurohen në fushën e stërvitjes
Duke përfituar nga pauza e kampionatit, gazeta Sporti shqiptar ka menduar të luftojë gjatë këtyre ditëve fenomenet negative në ish-kompleksin Dinamo, pikërisht lidhur me kushtet në të cilat skuadra 18 herë kampione e Shqipërisë stërvitet. Redaksia jonë nuk ka ndër mend të bëjë avokatin e askujt, por vetëm të lojës magjike, futbollit.
Duke qenë një gazetë sportive, na lind e drejta të mbrojmë interesat jo vetëm të Dinamos, të futbollit, por edhe të skuadrave dhe sporteve të tjera që ndodhen në kushte mjerane. Fuqia e gazetës është bërja publike e fenomeneve negative, ndërkohë që më pas shikojnë apo mbeten të verbra organet kompetente, mbetet ende në dorën e tyre. Por të shikosh se si është katandisur skuadra e Dinamos, është vërtet skandaloze.
Një ditë më parë është publikuar artikulli Dinamo si minatorët, duhen fenerë për stërvitje, pasi blutë nuk kanë mundësi të zgjedhin orarin e dëshiruar për të kryer seancën stërvitore, ata janë të imponuar nga Agjensia e Sporteve pranë MTKRS që ti startojnë përgatitjet në orën 17:00. Ndërkohë që një tjetër problem i hasur dje në seancën stërvitore kishte të bënte me dëmtimet dhe problemet e ndryshme fizike që futbollistët dinamovitë kalojnë ndeshje pas ndeshje.
Një dëshmi e tillë është edhe fotoja e këtij artikulli, e cila tregon qartë se ku masazhohen apo kurohen futbollistët blu. Në cepin e fushës me bar sintetik, në natyrë, duke përdorur kolinë e bidonave për të mbështetur këmbët e futbollistëve, fizioterapistët e Dinamos masazhojnë dhe kontrollojnë problemet e ndryshme të futbollistëve blu.
Dhoma e fizioterapisë në katin e dytë të ish-kompleksit Dinamo tashmë është kthyer në një magazinë. Aty mund të gjesh dokumente të bluve, kompjutera, kupa e gjithçka, por sigurisht smund të gjesh dot dhomën e fizioterapisë, e cila është kthyer në një bodrum për të futur gjërat e vjetra dhe në këto kushte sigurisht askush smund të punojë.
Kohë më pare, në këtë dhomë punohej gjërë e gjatë përpara seancave stërvitore, ku futbollistët relaksonin muskujt e tyre përpara seancave të ngarkuara. Tashmë turpi hahet me bukë, por kur edhe mensa e skuadrës mungon, palestra, lavanderia dhe gjithçka e mundshme, atëherë çfarë kërkojmë më shumë nga kjo Dinamo?
Futbollistët dalin nga fusha në përfundim të stërvitjes dhe ashtu të djersitur futen nëpër makinat e tyre dhe largohen për të bërë dush në shtëpitë e tyre. A mund ta quajmë këtë futboll?
Ky sport magjik që ka rrëmbyer zemrat e shumë sportëdashve, tashmë është kthyer në kushte skandaloze në Shqipëri, e kur flasim pikërisht për Dinamon, të vjen në mendje Federata Shqiptare e Futbollit, e cila për skuadrën kombëtare zgjedh hotelet më luksoze për stërvitje dhe akomodim, po Dinamo, siç duket, është e njerkës dhe të gjithë e lënë në mëshirë të fatit, në atë mëshirë që sot nuk po mendon për blutë, por i ka nxjerrë në mes të rrugës.
Dhe kur dimri të afrohet, lojtarët e Dinamos mund të ngrenë çadra kampingu brenda në fushë duke na kujtuar fiset e hershme që shtroheshin nga njëri shesh në tjetrin, duke kërkuar tokën e premtuar. Por kjo tokë e premtuar tashmë për dinamovitët është kthyer në të mallkuar dhe askush nuk po mendon për legjendën 61-vjeçare.
Blutë e vegjël, pjesë e kombëtares U-21
Veç trajnerit të portierëve, Ilir Bozhiqi, i cili është pjesë e kombëtares së Shqipërisë, në kampin blu ka pasur edhe mungesa të tjera ditën e djeshme. Kështu, edhe futbollistët e rinj Eni Imami, Antonio Marku dhe Andrea Kule i janë bashkuar përfaqësuseses Shpresa. Ndërkohë që edhe fizioterapisti Perli Rusi është pjesë e kombëtares së vogël kuqezi, e cila drejtohet nga trajneri Artan Bushati. Kujtojmë që një sezon më parë në përfaqësuesen e Shqipërisë ishin prezentë shumë lojtarë blu, tashmë të larguar në ekipe të tjera. Kështu Elis Bakaj, Gjergji Muzaka, Emiliano Vila dhe Isli Hidi gjithnjë kanë qenë pjesë e kuqezinjve. Por tashmë për vetë kushtet dhe aventurat që po kalon Dinamo, në grupin blu, duke veçuar ndonjë kokërr, ende nuk ka kontigjent të duhur për skuadrën kombëtare.