Bode, letër ministrave: Hiqni shoferët
Ministri i Financave, Ridvan Bode u kërkon institucioneve shtetërore të heqin shoferët, pas hyrjes në fuqi të ligjit për automjetet e funksionarëve të lartë dhe nëpunësve civilë. Nëpërmjet një letre, e cila mban datën 26 tetor 2009, drejtuar të gjitha ministrive, institucioneve të pavarura dhe institucioneve të varësisë nëpër rrethe, kreu i Financave kërkon informacion për numrin e makinave dhe të shoferëve që do të ketë secili dikaster në përputhje me përkufizimet e ligjit të dekretuar pak ditë më parë nga Presidenti Topi.
Letra
“Ministria e Financës do të iniciojë projektvendimin përkatës për numrin e automjeteve në dispozicion të aparatit të ministrive apo administratës së institucioneve të pavarura dhe kushtetuese si dhe numrin e automjeteve në dispozicion të institucioneve në varësi të tyre. Gjithashtu, pjesë e këtij projektvendimi do të jetë edhe lista e funksionarëve, të cilët në përputhje me veprimtarinë e tyre kanë të drejtën e një përfitimi financiar i cili nuk është parashikuar në projektligjin e sipërcituar”, thuhet në letrën e ministrit Bode drejtuar institucioneve shtetërore. Për këtë qëllim ai u ka kërkuar këtyre dikastereve informacion mbi numrin e automjeteve të domosdoshme për veprimtarinë funksionale të aparatit të ministrive apo administratës së institucioneve të pavarura, me argumentet përkatëse. Gjithashtu, Ministria e Financave ka kërkuar informacion për numrin e automjeteve të varësisë në rrethe dhe shoferëve, të cilët do të punësohen mbi bazën e ligjit të ri. “Kërkohet informacion i nevojshëm mbi emërtesat e funksionarëve të nivelit drejtor i përgjithshëm/ titullar i institucionit qendror apo rajonal në varësi të ministrive/institucioneve të pavarura, të cilat nuk janë përfshirë në listën e funksionarëve që parashikon projektligji për të përfituar masë të caktuar shpërblimi financiar por që në përputhje me veprimtarinë e tyre kanë të drejtën e këtij përfitimi”, thuhet më tej në këtë letër. Njëkohësisht Ministria e financave ka kërkuar informacion edhe për numrin e funksionarëve përfitues si dhe masën e përfitimit financiar. Sipas Bodes, informacioni nga ministritë për makinat dhe shoferët duhet të jepej brenda 30 tetorit, me një afat katër ditor nga momenti që u është dërguar letra, ndërsa institucionet në rrethe informacioni duhet të vijë brenda 10 nëntorit. Qeveria miratoi pak kohë më parë projektligjin e propozuar nga ministri Bode: “Për rregullimin e shërbimit të transportit për funksionarët e lartë dhe nëpunësit civilë”. Në bazë të këtij ligji vetëm krerët më të lartë të shtetit (Presidenti, Kryetarja e Kuvendit, Kryeministri, ministrat, krerët e institucioneve kushtetuese) do të kenë makinë dhe shofer, ndërkohë që kategoritë e tjera të zyrtarëve të lartë, përfshi këtu zv/ministrat dhe deputetët, do të trajtohen me bonuse.
tabela e zyrtareve qe u hiqen shoferet
Posti bonusi (lekë/në muaj)
1. Deputet 45.000
2. kryetar i Bashkisë Qendër Qarku 45.000
3. Kryetar i Autoritetit Mbikëqyrës F. 35.000
4. Kryetar i Komisionit të Konkurrencës 35.000
5. Kryetar i Kom. Mbrojtjes të dhënave personale 35.000
6. Kryetar i KSHC 35.000
7. Kryetar i KKRT 35.000
8. Kryetar i ERT 35.000
9. Kryetar i ERE 35.000
10. Kryetar i Entit Rreg. Ujërave të ndotura 35.000
11. Kryetar i ILDKP 35.000
12. Kryetar i KQZ 35.000
13. Kryetar i Akademisë së Shkencave 35.000
14. Rektorët e Universiteteve 35.000
15. Zv.kryetar i KLD 35.000
16. Kryetar i Këshillit të Qarkut 35.000
17. Gjyqtarët e Gjykatës së Lartë dhe Gjyk. Kushtetuese 35.000
18. Kryetar i Gjykatës së Shkallës I, Apelit, Krimet e Rënda 35.000
19. Drejtues i Prokurorisë pranë Gjykatës së Shkallës I,
Apelit, Krimeve të rënda 35.000
20. Kryetar Bashkie 30.000
21. Avokat i Prokurimeve Publike 30.000
22. Avokati i Shtetit 30.000
23. Dekan i universiteteve 20.000
24. Sekretar i përgjithshëm dhe drejtorët e kabinetit të ministrit 15.000
Funksionet që përfitojnë bonos
Posti bonusi (lekë/ në muaj)
1. Zv.ministër 35.000
2. Sekretar i përgjithshëm në Presidencë/ Parlament/ Kryeministri 35.000
3. Drejtor i Kabinetit në Presidencë/ Parlament/ Kryeministri 35.000
4. Këshilltarët në Presidencë/ Parlament/ Kryeministri 35.000
5. Gjeneral lejtnant dhe gjeneral major 20.000
6. Komandant i FA tokësore, detare, ajrore 20.000
7. Drejtor i Përgjithshëm i Tatimeve 20.000
8. Komandant Garde 35.000
9. Titullar i ZRRPP 35.000
10. Kryetar i AKKP 20.000
11. Kryetar i Komitetit Shtetëror të Kulteve 20.000
12. Drejtor i Përgjithshëm i Doganave 20.000
13. Drejtor i Përgjithshëm i Burgjeve 35.000
14. Titullar i zyrës qendrore të ALUIZNI 20.000
15. Gjeneral Brigade 15.000
16. Prefekt 15.000
17. Drejtor i Përgjithshëm i Emergjencave Civile 15.000
18. Drejtues i Policisë së Qarkut 15.000
19. Drejtues i SHISH i Qarkut 15.000
20. Drejtor i Përgjithshëm i ISSH 15.000
21. Drejtor i Përgjithshëm i ISKSH 15.000
22. Drejtor i Përgjithshëm i Rrugëve 15.000
23. Drejtor i Përgjithshëm i Pyjeve 15.000
24. Drejtor i Ujësjellësit 15.000
25. N/kryetar i Akademisë së Shkencave 20.000