Bogdanoviç: Referendumi "nuk është në interesin e Serbisë"

Ministri për Kosovën në Qeverinë e Serbisë, Goran Bogdanoviç, ka thënë se referendumi në veri të Kosovës jo vetëm që nuk është në interesin e Serbisë por mund ta ndërlikojë edhe më tej situatën.

“Nëse paraprakisht e dini rezultatin dhe përgjigjen në pyetjen e caktuar, atëherë mendoj se nuk duhet humbur kohë dhe energji me referendumin. Hapat e tillë mund të nxisin reagimin e bashkësisë ndërkombëtare dhe të shqiptarëve”, ka thënë Bogdanoviç për mediat serbe.

Sipas tij, një gjë e tillë, qytetarët e veriut të Kosovës i çon në përleshje “me shtetin e tyre”.

“Po t`i donte dikush institucionet e Kosovës, ne nuk do t’i vendosnim barrikadat në korrik të vitit të kaluar, për të parandaluar Prishtinën nga instalimi i institucioneve të saj”, ka thënë Bogdanoviç.

“Qëndrimi ynë është i qartë. Ne do të përpiqemi që përmes dialogut të luftojmë për interesat tona në Kosovë. Me dialog të zgjidhim të gjitha çështjet...”, ka shtuar Bogdanoviç.

Serbët e Mitrovicës, Zveçanit, Zubin Potokut dhe Leposaviqit planifikojnë mbajtjen e një referendumi në muajin shkurt me të cilin, siç thuhet, synohet të qartësohet vullneti i serbëve për lejimin apo moslejimin e shtrirjes së autoritetit shtetëror të Kosovës në veri të vendit.