Bora, situata ne veri, Olli: Rrugët kombëtare janë zhbllokuar

Nga Blerina Ahmetaj Tiranë, 19 Dhjetor NOA - Drejtoria e Emergjencave Civile në Tiranë  ka deklaruar të shtunën se situata e krijuar në veri të vendit si pasojë e temperaturave të ulëta e reshjeve të borës është normalizuar dhe të gjitha akset rrugore nacionale janë zhbllokuar. Drejtori i saj Alfred Olli tha të shtunën për mediat se problemi i vetëm janë disa zona të bllokuara në komunat e Kukësit dhe Tropojës.

Të gjitha akset rrugore nacionale janë të qarkullueshme për mjetet, njerëzit dhe mallrat në të gjithë vendin por qarku i Kukësit, Dibrës dhe Shkodrës ka pasur problematikë. Një problematikë është vënë re në zonat e Kukësit, Arren, Zapotit dhe Kërcajës të cilat janë të bllokuara, - tha Olli. Ai evidentoi se kemi pasur të bllokuara disa komuna të Tropojës, Lekbibaj dhe Markgefgaj për të cilat po punohet nga drejtoria rajonale e mirëmbajtjes së rrugëve. Sipas Ollit, një gjë për tu vlerësuar është fakti se nuk ka pasur bllokime që kanë kërkuar ndërhyrje emergjente dhe më e rëndësishmja që nuk janë shënuar aksidente të ndryshme. Mund ta konsiderojmë situatën normale pasi nuk kemi pasur kërkesa nga njësitë vendore dhe nga ana tjetër  të gjitha strukturat e shtetit janë të angazhuara për të mbajtur në gatishmëri mjetet që qarkullojnë. b.a/e.r/NOA