Bozdo: Shtyrja e statusit nuk ka kosto financiare për Shqipërinë

Refuzimi i statusit të vendit kandidat nuk ka asnjë kosto ekonomike për sa i përket mbështetjes financiare që Bashkimi Evropian ka planifikuar për Shqipërinë. Edhe pas këtij refuzimi, Shqipëria do marrë të njëjtën ndihmë financiare që do merrte në rast se do ishte vend kandidat. Eno Bozdo, zv/ministër i Ekonomisë, sqaron mënyrën se si ndahen fondet e Bashkimit Evropian për vendet kandidate dhe jokandidate. Shqipëria aktualisht përfiton ndihmë financiare nga BE-ja në dy komponentë kryesorë nga 5 të tillë.

Ndërtimi i institucioneve dhe bashkëpunimi ndërkufitar; për tre komponentët si zhvillimi rajonal, ai i burimeve njerëzore dhe zhvillimi rural, që përfitojnë vendet kandidate, Bashkimi Evropian do jepte fonde vetëm për ngritje strukturash dhe kapacitetesh.

Këto struktura, Shqipëria i ka ngritur me ndihmën e të tjerë donatorëve. Ndihma e vërtetë që BE-ja do i jepte Shqipërisë do ishte pasi vendi ynë të ishte anëtar me të drejta të plota në BE. Bozdo jep shembuj konkretë edhe për vendet e rajonit që e kanë marrë statusin e vendit kandidat. Shqipëria ka nënshkruar një plan mbështetjeje financiare me Bashkimin Europian deri në fund të vitit 2013, për fondet që do marrë. Sipas Bozdos, edhe në qoftë se Shqipëria do marrë statusin kandidat vitin e ardhshëm, shuma financiare që do përfitojë nga Bashkimi Evropian do jetë e njëjtë, por thjesht do ndahet në 5 komponentë, nga 2 që ndaheshin para marrjes së statusit.