Braçe: Qeveria kërkon të abuzojë me financat

Partia Socialiste i cilësoi realiste shifrat e dhëna prej Fondit Monetar Ndërkombëtar, sa i takon zhvillimeve ekonomike në Shqipëri. Nënkryetari i grupit parlamentar, Erion Braçe, deklaroi se qeveria po kërkon që ky mision të mos jetë në Shqipëri për zgjedhjet e qershorit. "Abuzim total me paratë e shqiptarëve në buxhetin e shtetit dhe paralajmërim akoma më i madh i dhunës fiskale që qeveria ka ushtruar edhe kundrejt vitit 2008", theksoi Braçe. Në këndvështrimin e selisë rozë, ritmi i të ardhurave po shkon drejt zeros dhe vetëm për muajin tetor është tërësisht i parealizuar zëri i akcizave. Të gjitha këto janë konsideruar si shkak të vjedhjes dhe korrupsionit, që qeveria jua faturon bizneseve. Socialistët u ndalën edhe te deklaratat e kreut të qeverisë Sali Berisha se Gërdeci ishte pasojë e një gabimi njerëzor. Braçe këmbënguli se të përdorësh për demontim dhe mbajtje fishekësh dhe predhash të kalibrave të mëdha gra dhe fëmijë është kafshëri njerëzore dhe jo gabim njerëzor.