Brukseli hap dyert e integrimit për Kosovën

Mbahet takimi i parë i Dialogut të Procesit të Stabilizim Asociimit ndërmjet Kosovës dhe BE-së

Zhvillohet sot në Prishtinë takimi i Dialogut të Procesit të Stabilizim-Asociimit, në të cilin po marrin pjesë përveç liderëve të institucioneve të Republikës së Kosovës, edhe përfaqësues të lartë të Bashkimit Evropian. Fjalën e hapjes e mbajti kryeministri i Kosovës, Hashim Thaçi, i cili vlerësoi këtë moment si një hap të rëndësishëm drejt sfidave të integrimit.
“Edhe pse është takimi i parë i Dialogut të Procesit të Stabilizim Asociimi, sot takohemi sikur vitin e kaluar për të diskutuar arritjet dhe sfidat e Kosovës në kuadër të procesit të integrimit Evropian. Ky takim rrumbullakon një varg takimesh sektoriale në fushat e ndryshme të zhvilluara ndërmjet institucioneve të Kosovës dhe Komisionit Evropian gjatë 6 muajve të kaluar. Të gjithë kemi qenë dëshmitarë të intensifikimit të dialogut të Kosovës dhe BE-së, dhe në këtë drejtim takimi i sotëm vazhdon të japë kontributin e veçantë drejt adresimit dhe tejkalimit të sfidave në mënyrë që procesi i përmbushjes së kritereve për anëtarësim në BE të ecën me hapa të sigurt. Në të kaluarën kam deklaruar se Qeveria ime është plotësisht e angazhuar në intensifikimin e dinamikës së procesit të integrimit. Këtë e deklaroj edhe sot me plot përgjegjësi dhe përkushtim, duke e mbështetur vullnetin tonë në veprime konkrete. Prandaj, intensifikimi i dialogut politik dhe teknik me Komisionin Evropian, i cili po ndodh këto ditë, kontribuon në mënyrë përmbajtjesore në avancimin e Kosovës drejt integrimit në Bashkimin Evropian”- deklaroi në fjalën e tij kryeministri Thaçi.
Në këtë takim, institucionet e Republikës së Kosovës do të ofrojnë informacione më të fundit sa i përket gjendjes reale në Kosovë, duke përfshirë progresin e arritur që nga publikimi i Raportit të Progresit 2009.

Presidenti i BE-së Rompuy, viziton Prishtinën: Prioritet bashkëpunimi rajonal dhe fqinjësia e mirë

Zyrtari i lartë i Brukselit përsërit se çështja e Kosovës nuk ka kthim pas dhe se Ballkani Perëndimor duhet të fokusohet në axhendën e integrimit

Kryetari i Këshillit Evropian, Herman van Rompoy, ka mbërrijtur në Prishtinë, në vizitën më të lartë të një zyrtari të BE-së që nga shpallja e pavarësisë. Ajo realizohet në kohën e shtimit të tensioneve në veri të Kosovës, ku brenda katër ditëve ka pasur dy incidente me viktima. Vizita e numrit një të BE-së në Kosovë është pjesë e një turneu të tij në disa vende të rajonit. Në ndalesën e tij në Prishtinë, që pason atë në Lubjanë, Beograd e Zagreb, Herman Van Rompuy pritet të përcjellë mesazhe për nevojën e dialogut ndërmjet Kosovës dhe Serbisë. Presidenti i Këshillit Evropian, në prag të ardhjes në Kosovë ka dënuar dhunën e ditëve të fundit në veri të Mitrovicës dhe ka thënë se BE-ja inkurajon dialogun për zgjidhjen e problemeve. Z.Rompuy ka dhënë porosi të qarta për përspektivën evropiane të Ballkanit, por ka theksuar se bashkëpunimi rajonal dhe fqinjësia e mirë janë kyç për ecjen përpara të Kosovës dhe Serbisë në rrugën e integrimit në BE. Vizita e kryetarit të Këshillit Evropian përkon me seancën e jashtëzakonshme të Këshillit të Sigurimit që mbahet në orët e pasditës për të diskutuar gjendjen në Kosovë pas incidenteve të fundit në veri të Mitrovicës që lanë pas vetes një të vdekur dhe mbi dhjetë të plagosur.