Buka, cmimi bie ne 50 leke

Ne kete kohe kur te gjithe kane dhene alarmin per krize ekonomike, cmimi i produktit baze te ushqimit te shqiptareve, bukes, ka rene dukshem. Buka e cilesise se pare ne kryeqytet dy dite me pare ka nisur te shitet me vetem 60 leke nga 80 leke qe shitej me pare, ndersa buka e zakonshme shitet me 50 leke nga 70 leke qe ishte. Nga nje vezhgim i gazetes ne pikat e prodhimit te bukes dhe te shitjes me pakice, dy jane arsyet kryesore, pse niveli i cmimit ka rene. Argumenti kryesor eshte ulja e cmimit te dritherave ne tregun nderkombetar dhe kryesisht grurit, i cili eshte pergjysmuar ne krahasim me nje vit me pare. Por nga ana tjeter, Autoriteti i Konkurrences se Lire ka nisur nje hetim mbi tregun e bukes ne Shqiperi, per deformim cmimesh. Kjo mesohet te kete sherbyer si presion mbi tregun, i cili ka reaguar me uljen e cmimeve. Nje vit me pare ne kete kohe cmimi i nje buke shkoi ne nivelin e 100 lekeve, per shkak te rritjes se cmimit te grurit ne tregjet e huaja. Por kete vit cmimet e lendeve te para, kane pesuar renie ne teresi dhe ne kete kontekst edhe cmimi i dritherave. Renia e cmimeve ne keto produkte eshte ndikuar nga kriza dhe frenimi i rritjes se ekonomise. Por nga ana tjeter prodhimi i grurit kete vit ka qene me i mbare, pasi fermeret ne te gjithe boten u nxiten te prodhojne sasi te medha gruri per shkak se, cmimi i ketij produkti kapi majat ne fillim te vitit qe shkoi. I njejti fenomen ka ndodhur edhe ne vendin tone. Ku fermeret te nxitur nga cmimi i larte i grurit kultivuan me kete bime mijera hektare toke. Ulja e cmimit te bukes, pervecse pritet te ndikoje pozitivisht ne uljen e shpenzimeve familjare, do te kete ndikime pozitive edhe ne te gjithe cmimet e produkteve te tjera, qe perdorin si lende te pare miellin.

Konkurrenca, hetim tregut te bukes

Autoriteti i Konkurrences ka ndermarre nje hetim te thelle ne tregun e importit te grurit dhe prodhimit te miellit. Ne raportin e saj per vitin 2008, Autoriteti i Konkurrences deklaron se gjate ketij viti nisi nje hetim, pasi mediat lajmeruan per rritjen e cmimit te bukes. Ky treg, fillimisht iu nenshtrua nje hetimi paraprak dhe bazuar mbi raportin e ketij hetimi, Komisioni i Konkurrences vendosi ne tetor te vitit te kaluar, hapjen e procedures se hetimit te thelluar ndaj ndermarrjeve importuese te grurit dhe prodhuese te miellit, per periudhen janar 2005-31 gusht 2008. Ne raport thuhet se procedurat e ketij hetimi pritet te dalin shume shpejt gjate ketij viti, por Autoriteti do te ftoje ne seance degjimore palet e interesuara, per te marre me pas vendimet perkatese. Prodhuesit e bukes deklaronin nje vit me pare se cmimi i miellit dhe mungesa e energjise, ishin shkaktaret per rritjen me 10 leke te cmimit te bukes. Nderkohe, gjate pjeses se dyte te vitit te kaluar, cmimi i grurit ne tregjet nderkombetare ka pesuar ulje, ndersa furnizimi me energji ka qene i vazhdueshem, por keto nuk u reflektuan ne uljen e cmimit te bukes ne vend.