CIA "luan" trilogjinë Bourne

CIA hartoi plane për krijimin e një skuadre sekrete që do të eliminonte fizikisht figurat kyçe të Al-Kaedës nëpër botë. Thuhet se agjencia kishte kohë që planifikonte dhe ka shumë mundësi që kishte filluar edhe trajnimin e operativëve për misionet sekrete, menjëherë pas 11 shtatorit. Një njësi e vogël merrej me anëtarët e mundshëm të Al-Kaedës që duheshin eliminuar dhe kjo, pavarësisht faktit se Gerald Ford i kishte ndaluar vrasjet, pas abuzimeve të shumta të CIA-s në vendet e Amerikës Latine në vitet ‘70. Mbështetësit e këtij plani donin të krijonin skuadra të koordinuara agjentësh dhe të forcave speciale për të eliminuar liderët e terroristëve. Detaje të skemës nuk i janë paraqitur Kongresit me urdhër të ish-presidentit Çeni. "Gjithçka ishte si nëpër filma", rrëfen për gazetën "Wall Street Journal" një ish-oficer. Gazeta e sipërpërmendur, që ka bërë të ditur lajmin, u është referuar ish-zyrtarëve të administratës së kaluar që janë anonimë. Sipas tyre, plani i konsideruar si tepër i fshehtë ishte operacional në momentin kur Leon Paneta, shefi i ri i CIA-s, mori detyrën. Për sa i përket agjencisë, ajo nuk ka bërë ende asnjë koment. Thuhet se CIA vepronte edhe nën një autorizim presidencial të vitit 2001. Ndërkohë, Presidenti amerikan ka urdhëruar stafin e tij të sigurisë kombëtare që të hetojë menjëherë lajmet që bëjnë amerikanët përgjegjës për vrasjen e 2000 të burgosurve të luftës talebanë, në ditët e para të luftës në Afganistan. Presidenti deklaroi se nuk e dinte si ishin sjellë

ushtarët në vitin 2001, por kishte kërkuar një llogaridhënie të plotë nga organet kompetente për çdo ngjarje të asaj periudhe. Së fundi doli se administrata e Presidentit Bush i kishte ndaluar hetimet për këtë çështje.