Damir Fazlliq akuzohet dhe në Prishtinë, përfiton miliona euro prej KEK-ut
Miliona euro para të taksapaguesve futen në xhepin e tij, ndërsa ai akuzohet se, është i përfshirë në afera kriminale në regjion.
Prishtinë, 16 Janar, 12:15, NOA - Biznesmeni serbo-boshnjak, Damir Fazlliq manovron edhe në Kosovë përmes kompanisë së tij, Rudnap. Miliona euro para të taksapaguesve futen në xhepin e tij, ndërsa ai akuzohet se, është i përfshirë në afera kriminale në regjion.
Përveç kompanisë Rudnap, Zyra e Hetuesve të Komisionit Evropian OLAF ka raportuar për parregullsi edhe për kontratat ndërmjet EFT dhe KEK-ut.
Lajmi është publikuar nga e përditshmja Infopress. Sipas saj, aktualisht kompanitë e kontraktuara për import të energjisë janë Espada, EGL, EFT dhe Rudnap.
Kompanisë së Fazlliqit sipas kësaj gazete i paguhet 119 euro për megavat orë ndërsa, KEK-u ka lidhur kontratë me këtë kompani me datë 8 tetor për të importuar 20- deri në 60 megavat orë energji elektrike.
Kompania e Fazlliq është licencuar nga ZRRE për të sjellë energji elektrike në Kosovës edhe për periudhën janar-qershor 2007.
Shumica e tregut të energjisë elektrike në regjion dominohet nga kompanitë serbe, si EFT, Rudnap, etj dhe llogaritet se këto kompani financojnë mafien dhe strukturat kriminale serbe te lidhura me regjin e Millosheviçit.
Emri i Damir Fazlliq u bë i njoftuar pas skandalit për shpëlarje të parave në Shqipëri dhe marrjen e tij në mbrojtje nga ana e kryeministrit Berisha, i cili deklaroi me mburrje se e ka mik Fazlliqin.
Në Shqipëri sipas Partisë Socialiste, Fazlliq me kompaninë e tij kanë shitur energji në vlerë prej 106 milion euro.
a.b/NOA