Dëbohet Gjilani
Në këtë kampionat, Gjilani nuk do të luajë më para tifozëve të vet.
Madje, edhe ndeshjen e parë të edicionit të ardhshëm skuadra kuqebardh do ta zhvillojë jashtë qytetit të Gjilanit.
Në fakt, pasi inicimit të procedurës disiplinore nga Komisioni i Garave, Komisioni Disiplinor i Federatës së Futbollit të Kosovës (FFK) të martën e ka dënuar këtë skuadër me pesë ndeshje jashtë qytetit të saj, dhe që të pesta ato takime do t’i zhvillojë pa praninë e shikuesve.
Kjo pasi për organet e shtëpisë së futbollit kosovar, Gjilani kishte bërë lëshime të mëdha në organizimin e ndeshjes të së dielës ndaj Hysit, në të cilin takim është shfaqur dhuna nga ana e tifozëve dhe lojtarëve vendas, të cilët kishin sulmuar fizikisht gjyqtarin, respektivisht portierin e ekipit mysafir.
Lajmin e ka konfirmuar për Express zëdhënësi i FFK-së, Fazli Berisha. Sipas rregullores, pesë ndeshjet e radhës në cilësinë e vendasit Gjilani duhet t’i zhvillojë rreth 30 kilometra larg folesë së vet. Madje, ky klub është obliguar që stadiumi i përkohshëm i saj t’i plotësojë të gjitha kriteret për zhvillimin e ndeshjeve të ardhshme kampionale.
Por, këto dënime të shqiptuara nga Federata e Futbollit e Kosovës e kanë tronditur këtë klub, i cili të mërkurën do ta shqyrtojë shumë seriozisht tërheqjen e tërësishme nga garat.
“Ne jemi të vetëdijshëm se kemi merituar dënim, por jo kaq rigoroz. Gjithë mllefin e fituar nga gjitha terrenet e tjera, Federata e zbrazi në Gjilan”, ka deklaruar për Express, nënkryetari i këtij klubi, Bekim Rexhepi.
“Të martën do të mblidhet Kryesia, dhe nëse gjithë anëtarët e konsiderojnë të rëndë këtë dënim, atëherë do ta shqyrtojmë mundësinë të tërhiqemi nga garat”, theksoi ai.
Njëherësh, Komisioni Disiplinor i FFK-së i ka pezulluar tre lojtarët e Gjilanit:Vllaznim Jashari, Florim Murseli e Lirion Ferati, të cilët e kishin shqelmuar portierin e Hysit, Afrim Ademin, me ç’rast ai është dashur të dërgohet në spital për të marrë tretman mjekësor.
Ndërkohë, është pezulluar edhe trajneri Sallah Sherifi, për shkak se kishte kundërshtuar vendimet e gjyqtarëve, duke e irrituar publikun. Që të katër këtyre u janë kërkuar deklarata, para se të ndëshkoheshin.
Dënimi ndaj Gjilanit vjen në kohën kur kjo skuadër bënte përpjekje të mëdha për të mbijetuar në Superligë.
Mt: Pezullohen rezultatet e ndeshjeve Gjilani – Hysi dhe Trepça – Vëllaznimi
Komisioni i Garave i FFK-së nuk e ka regjistruar fare rezultatin e arritur në fushë (1:1) të ndeshjes shumë të tensionuar mes Gjilanit e Hysit, pasi ekipi llapjan ka kërkuar që ai takim të regjistrohet me rezultat zyrtar, 0:3 në favor të tij.
Njëherësh, ky organ nuk e ka regjistruar as rezultatin (0:0) të ndeshjes Trepça – Vëllaznimi, pasi edhe gjakovarët kanë kërkuar fitore në tavolinë, me arsyetimin se vendasit e kishin inkuadruar në lojë një lojtar, emri i të cilit nuk ka figuruar në protokollin zyrtar të ndeshjes. Për epilogun e këtyre dy dueleve, Komisioni i Garave pritet të vendosë të premten.
Dënohet edhe Drita
Derbi më i madhi në Kosovë, ai i Anamoravës mes Dritës e Gjilanit, në fundjavën e ardhshme do të zhvillohet pa praninë e publikut, pasi Komisioni Disiplinor i FFK-së e ka dënuar edhe Dritën me dy ndeshje pa shikues, për faktin se nuk e kishte zhvilluar siç duhet takimin e javës së 23-të ndaj Lepencit, kur kishte tensione. Kurse, për shkak të atyre tensioneve, kaçanikasit janë ndëshkuar me një vërejtje.