Deklaratat e Moskes per integrimin e Serbise, reagon Beogradi

MYNIH-Ministri i Jashtëm i Serbisë Vuk Jeremiç tha se vendi i tij nuk ka ndonjë plan për të hyrë në NATO ose në ndonjë aleancë tjetër ushtarake. Duke folur në konferencën ndërkombëtare për sigurinë në Mynih, zoti Jeremiç tha se Serbia do të qëndrojë e paanshme ushtarakisht. Por ai shtoi se Beogradi, do të bashkëpunojë me NATO-n dhe vendet e tjera për të ruajtur paqen dhe stabilitetin në Ballkanin perëndimor. Jeremiç tha se Beogradi është veçanërisht i shqetësuar rreth paqes dhe stabilitetit në Kosovë. Ai u tha zyrtarëve që po diskutojnë rreth sigurisë globale, se një nga përparësitë kryesore të Serbisë është, që Kosova të diskutohet në nivelet më të larta ndërkombëtare. Beogradi ka thënë se nuk do ta njohë kurrë pavarësinë e Kosovës. Ndërkohë Rusia është një ndër shtetet e mëdha që e ka mbështetur qëndrimin e Beogradit për Kosovën duke mos njohur shtetin e ri ballkanik. Por, i dërguari i përhershëm i Moskës në aleancën e NATO-s, Dmitri Rogozin, ka thënë se Serbisë do t'i duhet të heqë dorë nga lufta për Kosovën, në se dëshiron të bashkohet me aleancën perëndimore. Në një intervistë të botuar të shtunën në revistën Blic, përfaqësuesi rus tha se NATO-ja mund ta pranojë Serbinë vetëm me kufijtë e saj të rinj, siç u shpreh ai, që nënkupton, pa Kosovën.  “Nëse Serbia do të vazhdojë të këmbëngulë që të hyjë në NATO, do të duhet të heqë dorë nga Kosova, dhe pas kësaj, edhe Rusia do të detyrohet ta rishqyrtojë qëndrimin ndaj Kosovës, sepse nuk mund të jemi serbë më të mëdhej se serbët, ka thënë përfaqësuesi i përhershëm rus në NATO, Dmitrij Rogozin. Te njejten deklarate beri te premten edhe ambasadori rus ne Beograd. (d.b/BalkanWeb)