Demollari: Për Kuzhen vendos vetëm presidenti Duka

Njeriu që u largua nga presidenti i FSHF-së pas humbjes së turpshme me Andorrën për t’i lënë vendin Dosenës, jep mendimin e tij

Ish-trajneri i Kombëtares, Sulejman Demollari ka analizuar lojën e kombëtares shqiptare gjatë dy ndeshjeve të fundit, duke deklaruar se duhej bërë zëvendësimi i disa lojtarëve. Në një intervistë dhënë për “Ora Neës”, ai ka komentuar edhe largimin e trajnerit të Kombëtares, Josip Kuzhe, duke theksuar se për këtë vendos vetëm Duka. “Puna e trajnerit varet tek rezultatet. Kjo është mëse e qartë, nëse rezultat janë të pranueshme aty ku janë kërkuar ëhtë mëse normale qëndrimi, nëse jo kjo duhet parë”, shprehet ai. Demollari ka qenë vetë një “viktimë” e Dukës që e gëzoi postin e trajnerit të kombëtares për vetëm pak muaj, pasi pas humbjes së turpshme në Andorra, e përfolur si “humbje e kurdisur” për të larguar pikërisht ish-legjendën e Dinamo nga kreu i kuqezinjve. Largimi i Demollarit i hapi rrugë më pas afrimit të italianit Dosena.

Përsa i përket ndeshjes së kombëtares shqiptare me Luksenburgun, Demollari theksoi se ekipi shqiptar u tregua i lodhur dhe në gjendje jo të mirë, ndaj sipas tij duhet të kërkohet më tepër ndaj ekipit. “Objektivi i ekipit kombëtar ngelet minimumi që mund të marrim tashti. Dëshiroja që edhe më shpejt të ishte kryer zëvendësimi i disa prej lojtarëve. Në futboll ndodhë për këdo, ka një fillim ka një fund. Kështu që mendoj se sa më shpejt të bëhet rinovimi për edicionin e ardhshëm. Mesfusha nuk ishte në lartësinë e duhur. Mundësitë ishin, pavarësisht mungesave të lojtarëve. Nga një ekip modest siç ishte Luksenburgu nuk duhet të gjejmë justifikimin tek mungesa e lojtarëve, pasi ata duhet të ishin më të përqendruar për të kaluar këtë ndeshje me sukses”, shprehet Demollari. Duke u ndalur tek ndeshja e fundit e kombëtares shqiptare me Rumaninë, Demollari theksoi se nëse mëndohet për ngritje niveli duhet ndryshim mentaliteti në infrastrukturën kryesore. Sipas tij kjo duhet të jetë pikë e rëndësishme për programin dhe strategjinë e Federarës Shqiptare të Futbollit.