Dhuna në Siri, në nivele "të papranueshme"

Presidenti turk, Abdullah Gyl, ka thënë se situata në Siri ka arritur “nivele të papranueshme”. Sipas agjensisë “Anatolia”, 17 persona kanë vdekur. Komentet e Gylit pasojnë përleshjet e dhunshme në Harasta, e cila ndodhet në rrethinën e Damaskut.

Ato po ashtu vijnë në kohën kur Liga Arabe po përgatitet të dërgojë sekretarin e saj të përgjithshëm, Nabil al-Arabi, në Damask, për të ofruar “nisma për zgjidhjen e krizës”. Në deklaratën e lëshuar sot, Liga Arabe shpreh shqetësimin për gjakderdhjet, duke thënë se stabiliteti në Siri është kyç për stabilitetin në botën arabe dhe në rajonin e Lindjes së Mesme.

Ambasadori i Rusisë në Kombet e Bashkuaram, Vitali Çurkin, tha se i dërguari i Moskës pritet të arrijë sot në Damask. OKB thotë se mbi 2,000 civilë kanë humbur jetën që nga shpërthimi i trazirave anti-qeveritare në Siri, në muajin mars.