“Diferenca e 140 mijë votave, dëshmi e besimit të qytetarëve te qeveria “Berisha”

Deputetja e PD-së Mesila Doda

Deputetja e Partisë Demokratike, Mesila Doda, deklaron se Shqipëria ka shënuar rezultate pozitive në mjaft sektorë të rëndësishëm.
Sipas saj, një prej politikave të qeverisë që ka rezultuar eficente është ajo e investimeve në infrastrukturë.
“Në Shqipëri, janë ndërtuar mijëra kilometra rrugë, ndërsa edhe turizmi po shënon një ecuri pozitive”, tha ajo.
Duke shtuar më pas, se ka arritje të shkëlqyera në aspektin ekonomik.
“Shqipëria është sot një vend që eksporton, ku bëhet turizëm, ku rriten pagat dhe pensionet, ku pakësohet gjithmonë e më shumë shtresa e varfërisë”, etj.
Deputetja e PD-së ka vënë gjithashtu në dukje faktin se “ekonomia ka qenë kali i betejës së qeverisë”.
“Shumë ekonomi perëndimore janë prekur nga efektet e krizës ekonomike, kurse Shqipëria tregoi se i rezistoi shumë mirë asaj. Sot nuk ka më asnjë dyshim se 140 mijë vota të marra më shumë nga Aleanca për Qytetarin në zgjedhjet e 8 Majit, janë një provë bindëse e besimit të qytetarëve tek reformat dhe arritjet që përmendëm të qeverisë”, shtoi Doda.
Këto referuar aspektit ekonomik, ndërsa lidhur me fusha ku ka ende për të bërë, ajo tha se të tilla janë p.sh ato në sistemin e drejtësisë, i cili po ndesh vështirësi.
“Drejtësia duhet të qëndrojë larg politikës dhe korrupsionit. Nga ana e saj, mazhoranca i ka respektuar vendimet e marra nga sistemi i drejtësisë”, deklaroi më tej ajo.