Dita e të Verbërve, apel për plotësimin e kërkesave

Mungesa e sinjalistikës dhe rrugëve të posaçme për personat e verbër në vendin tonë vazhdojnë të mbeten problemet më emergjente që kërkojnë zgjidhje. Ky shqetësim ngrihet të paktën një herë në vit nga të verbrit në datën 15 tetor, e cila simbolizon dhe Ditën Ndërkombëtare të Shkopit të Bardhë, një mjet mjaft i domosdoshëm që i mundëson këtij kontingjenti lëvizjen. Por, këtyre shqetësimeve iu shtohet së fundmi edhe problemi i punësimit. “Infrastruktura rrugore në Shqipëri nuk është e përshtatur për personat e verbër. Për sa i përket punësimit, kjo lë për të dëshiruar. Për arsye se personat e verbër nuk janë të kualifikuar në kuptimin e shkollave profesionale. Dhe ata të verbër, të cilët në profesionin e tyre nëpërmjet universiteteve që kryejnë gjejnë shumë vështirësi në administratën publike apo private”, - pohon kryetari i Shoqatës së të Verbërve për Tiranën, Ervin Kapedani. Dita e Shkopit të Bardhë daton që nga viti 1964, kur presidenti amerikan Johnson ka nënshkruar një deklaratë, e cila i konsideron personat me shikim të kufizuar, të denjë për të gëzuar të gjitha të drejtat. Në vendin tonë numërohen rreth 10 mijë persona që nuk shikojnë.