Dritan Agolli: Nis asfaltimi i “Rrugës së Durrësit”

Bashkia e Tiranës ka filluar punën për asfaltimin e “Rrugës së Durrësit”. Punimet kryhen në kuadër të projektit të transportit multimodal të qytetit të Tiranës, i cili synon të sjellë një përmirësim të vazhdueshëm në skemën e qarkullimit, në akset kryesore të Tiranës.
 

Administratori i Përgjithshëm i Bashkisë së Tiranës, Dritan Agolli, i cili ishte i pranishëm në fillimin e këtyre punimeve, u shpreh për mediat se kjo rrugë ka pasur mjaft probleme sa i përket shtresave asfaltike, ndaj ishte i domosdoshëm asfaltimi dhe sistemimi i saj.
 

Agolli ka kërkuar njëkohësisht mirëkuptimin dhe bashkëpunimin e qytetarëve, në mënyrë që ata të respektojnë rregullat e nevojshme të qarkullimit dhe që kjo ndërhyrje në rrugën e Durrësit, ashtu si edhe mjaft projekte të tjera infrastrukturore të Bashkisë së Tiranës, të mund të realizohet me sukses dhe në një kohë sa më të shpejtë.