Dritat konsumatori i pambrojtur
Në një nga pikat më të nxehta, atë të ankesave, kontrata thotë se ÇEZ do të trajtojë çdo ankesë të konsumatorëve në përputhje me rregullat e saj të brendshme.
“Konsumatori mund të marrë një përgjigje nga ÇEZ vetëm mbi bazën e rregullave të ÇEZ-it, jo mbi bazën e një kodi të matjes i cili sot është i miratuar nga ERE. Po të marrim një konsumator që ankohet për cilësinë e furnizmit, ose për ndërprerjet në orare të ndryshme, ÇEZ-i mund t’i përgjigjet me rregullat e veta dhe aspak me Kodin e Matjes”, është shprehur eksperti Gjergj Simaku.
Draft-kontrata thotë se ÇEZ është i detyruar të shqyrtojë çdo ankesë të konsumatorëve brenda një muaj nga regjistrimi i saj dhe më pas kompania informon klientin mbi arsyet e mospranimit të pretendimeve dhe të drejtat e tij.
“Pra ÇEZ-i që është palë duhet të gjykojë mbi ankesat. Ndërkohë që gjykatësi në këtë mes nuk është ÇEZ-i, nuk është konsumatori, por është ERE. Ai i vendos rregullat. Në këtë rast ÇEZ-i bën arbitrin dhe ky është absurdi”, thotë Simaku.
Por sa mundësi kanë konsumatorët që kur çështja të shkojë në gjykatë, të mund të vërtetojnë se ata janë dëmtuar nga cilësia e dobët e furnizimit me energji?
“Përshembull rritjet e shpeshta të tensionit, ose uljet e shpeshta të tensionit apo djegiet e pajisjeve, nuk i vërteton kush dhe kjo për mendimin tim është një boshllëk shumë i madh në kontratën midis konsumatorit dhe ÇEZ-it. Pra vetë konsumatori ose ERE nuk ka këtë përgatitje që specialistët e vetë të vërtetojnë një ngjarje si kjo”, thotë Simaku.
Pak ditë më parë Enti publikoi draft-kontratën e energjisë, e cila pritet që pas një faze diskutimesh me grupet e interesit të hyjë në fuqi.