Drogba, mungesë e madhe për Chelsean

Mesfushori Frank Lampard ka pranuar se largimi i Didier Drogbas do të lërë boshllëk të madh në ekipin e Chelseat. Sulmuesi i Bregut të Fildishtë të martën ka lajmëruar se nuk do të vazhdojë kontratën me klubin londinez dhe gjatë verës do të kërkojë një skuadër të re.

Drogba ka kaluar tetë vite me Chelsean, ekip me të cilin këtë edicion fitoi Ligën e Kampionëve dhe Lampard ka thënë se ai është njëri nga lojtarët më të mirë që ka pasur ndonjëherë Premierliga.

“Nuk e kam parë se është përmendur shumë Drogba kur është votuar për ekipin më të mirë të Premierligës në 20 vitet e fundit. Ndoshta sepse njerëzit kanë dëshirë të flasin edhe për anën tjetër të lojës së tij. Por, duke luajtur me të në tetë vitet e fundit, po ju them pa dyshim se ai është sulmuesi më i mirë me të cilin kam luajtur ndonjëherë”, tha Lampard për The Sun.

Lampard po ashtu beson se mungesa e Drogbas do të lërë boshllëk të madh te gjiganti londinez. “Drogba do të lërë një boshllëk të madh në klub, por unë e dua atë dhe nuk jam i zhgënjyer pse ai po largohet, pasi ai meriton gjithçka që merr”, përfundoi ai.