Dumani i përmëndi emrin gjatë dëshmisë, reagon Naço: Distancohem nga çdo akuzë, ftoj organet e drejtësisë të hetojnë çështjen

Ish-ministri i Drejtësisë, Nasip Naço ka reaguar pas përmendjes së emrit të tij nga ana e të penduarit të drejtësisë, Nuredin Dumani, i cili deklaroi se i ka dhënë dhëndrit të vëllait të Naços para për të dalë nga burgu.

Në reagimin e tij Naço thekson se distancohet nga çdo akuzë e bërë publike, ndërsa i bën thirrje organeve të drejtësisë që të kryejnë një hetim të thelluar mbi këtë rast.

Reagimi i Naços:

Jam njohur sot nga mediat ku përmendet emri im. Dua të theksoj se:

 1.Distancohem nga çdo akuzë e bërë publike sot dhe ftoj organet e drejtësisë që të kryejnë një hetim të thelluar mbi këtë rast. Nëse akuzat vërtetohen, organet përkatëse duhet të marrin masa ligjore ndaj çdo personi të përfshirë në këtë çështje.

 2.Roli i Ministrit të Drejtësisë, sipas legjislacionit në fuqi, është i kufizuar. Ministri:

 – Nuk heton,

 – Nuk ngre akuza,

 – Nuk pushon çështje,

 – Nuk jep vendime fajsie apo pafajsie.

Detyra e tij lidhet vetëm me dhënien e lejeve të veçanta për të dënuarit, bazuar në ligj.

 3.Gjatë ushtrimit të detyrës sime si Ministër i Drejtësisë, nuk kam miratuar asnjë leje të veçantë për subjektin në fjalë.

 4.Distancohem nga çdo mashtrim, i bërë nga kushdo, individualisht apo në bashkëpunim, për të dëmtuar integritetin tim. Akuzat publike të bëra sot nuk përputhen me faktet reale të ushtrimit të detyrës sime si Ministër.

Faleminderit!