Durrës, nisin punimet për ndërtimin e 252 apartamenteve për të pastrehët

Strehimi mbetet një nga problemet më të rënda sociale, për të cilin duket se është menduar seriozisht në qytetin Durrësit, ku ditën e djeshme ka nisur zbatimi i projektit më të madh infrastrukturor në qytet siç është ndërtimi i disa pallateve me qëllime sociale me 252 apartamente. Bëhet fjalë për katër pallate me nga 8 kate secili që do të ndërtohen brenda 18 muajve në lagjen 17 të Durrësit. Kryebashkiaku i Durrësit i cili përuroi fillimin e punimeve për këtë projekt, Vangjush Dako deklaroi se kjo është vetëm faza e parë e këtij projekti gjigand që do të lehtësojë problemin e familjeve të pastreha në Durrës. Kemi filluar një nga projektet më të mëdha infrastrukturore, i cili do të lehtësojë gjithashtu një problem të madh social në Durrës siç është strehimi i familjeve të pastreha. Në këtë kompleks pallatesh do të strehohen me qira të ulët 252 familje gjë që lehtëson problemin e të pastrehëve në qytetin tonë, u shpreh kryebashkiaku Dako, sipas të cilit kjo është faza e parë e këtij projekti sepse në fazën e dytë do të ndërtohen edhe 90 apartamente të tjera për të kompletuar të gjithë kompleksin e këtyre banesave me qëllime sociale. Ardhja në ndihmë të kësaj kategorie njerëzish që kërkojnë strehim për një jetesë normale është konsideruar nga Dako si prioritet i institucionit që ai drejton. Ky projekt do të mundësojë zbutjen e problemit të strehimit tek shtresat e varfra të shoqërisë në qytetin e Durrësit dhe i gjithë projekti është financuar me kredinë e përfituar nga CEB-i në vlerën 3.341.410 euro. Në fazën e parë ka filluar puna për ndërtimin e katër pallateve me nga 8 kate secili ku do të ketë gjithsej 252 apartamente të ndara në 118 apartamente 2+1 dhe 134 apartamente 1+1. Vlera e këtij investimi është 520 milion lekë të rinj dhe punimet do të përfundojnë pas 18 muajsh. Sipërfaqja e truallit në dispozicion të këtyre banesave është 8309 metër katror, ndërsa në total sipërfaqja e ndërtimit është 22 000 metër katror. Pas këtyre banesave do të vijojë edhe faza e dytë ku do ët ndërtohen të tjera apartamente pasi i gjithë projekti parashikon ndërtimin e 342 apartamenteve me qëllime sociale. Këto banesa do tu jepen të pastrehëve me qira sociale të ulët që mund të arrijë nga 5 000 deri në 7 000 lekë të rinj në muaj. Me përfundimin e këtij projekti pretendohet që mungesa e strehimit, si një nga plagët më të mëdha të shoqërisë tonë jo vetëm në Durrës por në të gjithë vendin, të mund të reduktohet në një farë mënyre.