Elbasan /Ksera: Fonde shtesë për të nxitur punësimin

Një fond prej 10 milionë lekësh të reja do të përdoret për nxitjen e punësimit në qytetin e Elbasanit. Kjo është deklaruar nga ministri i Punës, Çështjeve Sociale dhe Shanseve të Barabarta, Spiro Ksera, gjatë një vizite në këtë qytet. Këtë vit një rëndësi e veçantë do i jepet qendrave të formimit profesional në vendin tonë, ku qyteti i Elbasanit zë vendin e parë me një qendër model, ku janë investuar më shumë se 2.2 milionë dollarë, - ka theksuar ministri Ksera. Ministri Ksera ka zhvilluar vizita edhe në qendrën antitrafikim‚ “Tjetër Vizion” si dhe te qendra e fëmijëve “Orët Fatlume”. Ministri Ksera u shpreh se “reformimi i skemës ekonomike do të sjellë zhdukjen e fenomenit të abuzimeve me këtë skemë”. Më parë ministri i Punës, Çështjeve Sociale dhe Shanseve të Barabarta, Spiro Ksera, zhvilloi një takim me Prefektin e Qarkut të Elbasanit, z. Shefqet Deliallisi. Në këtë takim ministri Ksera foli për mbështetjen në buxhet të një shoqate jofitimprurëse, e cila merret me gratë e vajzat e trafikuara. Kjo kategori, sipas ministrit, do të përfitojë nga Ministria e Punës ndihmë ekonomike, pasi të dalin nga qendra e posaçme për to. Gjithashtu, ministri përmendi edhe reformimin e skemës ekonomike, e cila do të nisë me nxjerrjen e specialistëve në terren, të cilët do të bëjnë të mundur identifikimin e atyre familjeve që duhet të përfitojnë ndihmë sociale, duke synuar kështu zhdukjen e fenomenit të abuzimeve me këtë skemë. Deri tani kanë përfituar ndihmë sociale shumë familje që nuk e meritojnë, por sipas ministrit Ksera, tani fondi do të shkojë në familjet që janë realisht në varfëri ekstreme. Ai ka folur edhe për pagesa nëpërmjet sistemit bankar apo postar. Gjithashtu, në takim ministri i Punës ka përmendur edhe një program punësimi, ndërsa ka shtuar se fondi për punësim në Elbasan është rritur me 24%. Ndërkohë edhe për emigrantët ekziston një projekt që i mbështet, ndërsa shumë shpejt liberalizimi i vizave do të sjellë edhe hapjen e tregut. Vizita e ministrit Ksera në Elbasan vijoi në qendrën e formimit profesional. Këtu, Ksera theksoi se prioritet do t’i jepet edhe Qendrës së Formimit Profesional, qendër e cila do të nxisë dhe zbusë papunësinë në vend.