Emigrimi ra pas vitit 2000

Fatmirësisht, emigrimi i individëve me kualifikim të lartë është zvogëluar ndjeshëm që nga viti 2000, dhe madje ka edhe shenja të kthimit të emigrantëve. Emigrimi i akademikëve dhe kërkuesve shkencorë nga universitetet dhe institucionet kërkimore arriti kulmin gjatë periudhës 1991-’93, menjëherë pas hapjes fillestare të vendit, me një kulm të dytë në vitet 1997-’99, si rezultat i kaosit politik dhe social në këtë periudhë. Që nga ajo kohë, emigrimi ka ardhur duke u ulur si rezultat i një sërë faktorësh, përfshirë përmirësimin e situatës ekonomike dhe sociale në Shqipëri (rroga më të larta dhe përmirësime në universitete), rritja e moshës mesatare të punonjësve të universiteteve, dhe vështirësia në rritje për të emigruar në vendet e Europës Perëndimore.