Ettore Sequi: Eksportet shqiptare në tregjet e BE, biznesi në Shqipëri po lulëzon

Ambasadori i Bashkimit Evropian në Tiranë, Ettore Sequi fton investitorët evropianë të përqendrojnë investimet e tyre në Shqipëri, pasi është i vetmi vend në rajon dhe në Evropë që ka rritje të eksporteve në kohë krize ekonomike

Ambasadori i Delegacionit të Bashkimit Evropian në Tiranë, Ettore Sequi, shprehu  të enjten mbështetjen e plotë të BE-së për të bashkëpunuar në projekte të rëndësishme që do të ndërmarrë biznesi për rritjen e prodhimit vendas dhe konkurrueshmërinë e prodhimeve. 

Gjatë fjalës së tij në ceremoninë e fillimit të vitit për investitorët e FIAA-s, duke vlerësuar zhvillimet në ekonominë shqiptare, vuri në dukje rritjen e eksporteve shqiptare gjatë vitit 2011, dhe parashtroi alternativat për investime të rëndësishëm në ekonominë shqiptare gjatë vitit 2012. Ambasadori Sequi tha se në vitin 2011 BE mbështeti me 1,4 milionë euro zhvillimin e bizneseve në Shqipëri. “Shoqata e investitorëve të huaj në Shqipëri (FIAA), një organizatë e suksesshme”, tha ai, “është një grup i fuqishëm, me rol të rëndësishëm në progresin e projekteve ekonomike, por që kërkon nevojën  e ndërmarrjes së reformave  për prosperitet të suksesshëm”. FIAA operon prej disa vitesh në vendin tonë dhe ka mision të punës së saj të informojë të gjithë investitorët  që dëshirojnë të mësojnë më shumë rreth potencialeve shqiptare të burimeve natyrore dhe të gjithë ata që duan të zgjerojnë dimensionet e bizneseve të tyre në Shqipëri.