FBI: Një milion dollarë për “kokën” e ish agjentit

Byroja Federale e Hetimeve (FBI) ka deklaruar çmimin prej 1 milion dollarësh për informacione që çojnë direkt te lokacioni dhe kthimi i sigurt i ish agjentit të saj, Robert A. Levinson, i cili u zhduk nga ujdhesa Kish e Iranit, para pesë vitesh.

Familja e zotit Levinson, vitin e kaluar, ka publikuar një video të rrëmbyesve në të cilën ish agjenti i FBI-së, e përshkruan zënien e tij dhe kërkon që qeveria e Shteteve të Bashkuara ta ndihmojë.

Kjo video i ishte dërguar familjes me email, në vitin 2010, nga rrëmbyesit e dyshuar të zotit Levinson.

Rrëmbyesit nuk kanë bërë kërkesa për lirimin e tij. Robert A. Levinson kishte dalë në pension nga FBI dhe punonte si hetues privat, kur në mars të vitit 2007 udhëtoi për në Iran.

Familja e tij thotë se ai kishte arritur në ujëdhesën Kish për shkak të një hetimi lidhur me kontrabandën e cigareve.