FOKUS – BM-SHBA marrëveshje për përshpejtimin e ndërtimit të centraleve bërthamore
LONDËR, 15 shtator /ATSH-DPA/- Britania e Madhe dhe SHBA-ja kanë rënë dakord për një marrëveshje për të nxitur ndërtimin e centraleve bërthamore në të dy vendet, e cila do të nënshkruhet gjatë vizitës shtetërore të presidentit të SHBA-së, Donald Trump këtë javë.
“Downing Street” tha se kjo javë do të shohë një “ndryshim të madh” në marrëdhëniet BM-SHBA, pasi Starmer dhe Trump pritet të nënshkruajnë gjithashtu një marrëveshje partneriteti teknologjik për të thelluar lidhjet kulturore.
“Miqësia e pathyeshme pritet të arrijë nivele të reja gjatë vizitës shtetërore”, tha “Downing Street”.
Partneriteti Atlantik për Energji Bërthamore të Avancuar pritet të nënshkruhet gjatë vizitës së presidentit Trump dhe do të mundësojë marrëveshje midis kompanive amerikane dhe britanike.
Marrëveshja do të hapë rrugën për një zgjerim të madh të projekteve bërthamore në Britani të Madhe, si pjesë e përpjekjeve të qeverisë për të prodhuar energji të pastër.
“Ky partneritet i rëndësishëm bërthamor BM-SHBA nuk ka të bëjë vetëm me furnizimin me energji të banesave tona, por ka të bëjë me furnizimin me energji të ekonomisë sonë, komuniteteve tona dhe ambicieve tona”, tha Starmer.
“Këto angazhime të mëdha na vendosin në rrugën e duhur drejt një epoke të artë të energjisë bërthamore – që do të ulë faturat e familjeve në planin afatgjatë, ndërsa do të krijojë mijëra vende të mira pune në planin afatshkurtër”, shtoi ai.
Sipas marrëveshjes bërthamore civile, të dy vendet do të përshpejtojnë kontrollet e projektimit të reaktorëve. //a.i/