Ferrari nuk garon në F3

Pasi e humbi çështjen në Gjykatën e Parisit, Luka Kodrero di Montexemolo konfirmoi se Ferrari do të largohet nga F1, nëse aprovohen rregullat e reja për vitin 2010. Presidenti i "kokëkuqes" deklaroi: "Nëse Formula 1 shndërrohet në Formula 3, Ferrari nuk do të garojë". Ky ishte thelbi i fjalimit të mbajtur në Asamblenë e Konfederatës së Përgjithshme të industrisë italiane. Rreth këtij problemi ka folur edhe Flavio Briatore. "Çështja e ‘tavanit‘ në buxhetin e skuadrave për kampionatin 2010 nuk duhet parë si një përplasje ndërmjet Ferrarit dhe FIA-s. Nuk është fjala e Moslit kundër asaj të Montexemolos", deklaroi menaxheri i skuadrës Reno. "Në këtë rast, Ferrari përfaqëson skuadrat, pra FOTA-n dhe së bashku po punojmë që të gjejmë një zgjidhje të drejtë për të gjithë. Nevojitet një ‘qeverisje‘ e përshtatshme për këtë sport". Në prag të mbledhjes zyrtare të FOTA-s, e parashikuar për t‘u mbajtur sot, Briatore është shfaqur mjaft aktiv, duke organizuar takime me kolegë të skuderive të ndryshme, që janë kundër rregullave të reja.