Festa e shenjtë le të shërbejë për të na bërë më të mirë dhe për të çrrënjosur kulturën e urrejtshme të sherrit

Presidenti i Republikës, Bujar Nishani dhe kryeministri Sali Berisha urojnë besimtarët myslimanë me rastin e Bajramit të Madh

Kryeministri Sali Berisha i bashkohet urimeve drejtuar besimtarëve myslimanë, me rastin e festës së Fiter Bajramit. Nga foltorja e Mbledhjes së Qeverisë, Berisha nisi urimin për festën e Bajramit me gazetarët, duke ju uruar gëzuar ditën e Bajramit. “Në këtë ditë ku nderojmë të gjithë sakrificën për më të mirën për Zotin, për atë që besojmë”- tha kryeministri Berisha në urimin e tij. Ndërkaq, presidenti i Republikës, Bujar Nishani nëpërmjet një mesazhi të shpërndarë për mediat ka uruar të gjithë besimtarët myslimanë shqiptarë për Festën e Bajramit. Ndërsa e quan Bajramin një festë të shenjtë, Nishani shton se ajo shërben për të na bërë më të mirë për veten, për tjetrin dhe për shoqërinë. “Të dashur myslimanë shqiptarë kudo ku ndodheni! Ju uroj nga zemra Gëzuar Bajramin, festën më të madhe dhe më të bukur të myslimanëve, festën Tuaj, festën time, festën e të gjithëve, atë festë gjatë së cilës gëzohen pa dallim, i madh e i vogël, burra e gra, të varfër e të pasur, të gjithë nën shenjën e bashkimit dhe besimit të pafundmë dhe të pakushtëzuar ndaj Zotit. Gëzuar pra këtë festë të shenjtë, e cila, pas sakrificës sjell shplodhjen, pas hezitimit bindjen, pas dobësisë forcimin, pas vuajtjes Besimin. Nga një Ramazan në tjetrin Ramazan, pra nga një sakrifikim në tjetrin, nga një Bajram në tjetrin Bajram, pra nga një festë në tjetrën festë, provojmë dhe dëshmojmë efektivisht besimin ndaj Zotit. Dhe Zoti çdo herë na shpërblen. Duke na bërë më të mirë; për veten, për tjetrin, për shoqërinë. Duke na bërë më të fortë fizikisht, më të kthjellët mendërisht, më të gatshëm për sfida të tjera edhe më të vështira, që i ka jeta, i ka ekzistenca. Jo dëshpërim, jo lëndim, jo brenga. Vetëm gëzim, lumturi dhe begati, dhe bekimin e Zotit, dashurinë e Zotit, ndihmën e Zotit, paqe, dhe urtësi sjelltë për të gjithë Ju kjo ditë, ky Bajram”, thuhet në mesazhin e Presidentit.
Nishani apeloi më tej se festa të tilla duhet të na shërbejnë për ta parë botën me sy të tjerë, duke mposhtur kulturën e urrejtjes. “Le të na bëjë ky Bajram ta shohim botën dhe jetën me sytë e të dobëtëve dhe të varfërve. Le ta mposhtim me mjete paqësore, me sakrifica si Ramazani dhe festa si Bajrami, kulturën e urrejtshme të sherrit, këtë rudiment të rrezikshëm trashëguar nga e kaluara diktatoriale. Nga thellësia e zemrës, ju uroj gjithë të mirat në këtë ditë të madhe. Le të jetë Dita e Bajramit një ditë e lumtur. Gëzojeni këtë ditë bashkë me të dashurit Tuaj. Ngushëllohuni bashkërisht. Ndihmohuni bashkërisht. Këshillohuni bashkërisht. Gëzohuni bashkërisht në këtë ditë Bajrami”, përfundon mesazhi kreut të shtetit, Bujar Nishani.