Fjalë dhe muzikë nga toka shqiptare, prezantohen në Torino

Shoqata Kulturore Italo-Shqiptare Vatra për të prezantuar kulturën shqiptare në Itali ka organizuar aktivitetin Fjalë dhe muzikë nga toka shqiptare, ku publiku italian pati mundësinë të njihej me poezinë, muzikën dhe artin shqiptar. Veprimtaria u realizuar në kuadër të manifestimit

Integrimi nuk bie nga qielli i cili është organizuar nga Instituti Goethe dhe Bibliotekat e Qytetit të Torinos. Takimi me artistët shqiptarë u bë në mjediset e Mood Libri & Caffè, e cila është një librari hibride, që konsiderohet një nga vendet më trendy të qytetit të Torinos. Programi parashikonte leximin e pjesëve të zgjedhura të autoreve shqiptare Anilda Ibrahimi dhe Ornela Vorpsi, veprat e të cilave janë botuar vitet e fundit në italisht nga shtëpia botuese prestigjioze torineze Einaudi. Pjesët e zgjedhura u lexuan nga Jessica Anzalone, një vajzë e re italo-shqiptare. Leximet u shoqëruan me muzikë klasike të autorëve Arcangelo Corelli dhe Çesk Zadeja, të ekzekutuar nga artistet Eriola Gripshi (violë) dhe Lizabeta Soppi (violinë). Gjatë mbrëmjes, për publikun e pranishëm u prezantuan për herë të parë edhe disa prej poezive të pabotuara të shkrimtarit të ri dhe të talentuar torinez me origjinë shqiptare Edvin Kukunja, nga vetë autori. Në takim e morën fjalën edhe Anna Belpiede, përfaqësuese e Bibliotekave të Qytetit të Torinos, Estela Maggiorotti e organizatës Il Nostro Pianeta dhe Amanda Demneri, përfaqësuese e Shoqatës Kulturore Italo-Shqiptare Vatra të Torinos.

Last Updated on E Merkure, 28 Prill 2010 21:07