Forcimi i rolit të autoriteteve rajonale, me qëllim thithjen e fondeve të programit të IPA-s

Kryeministri Berisha pret një delegacion të Asamblesë së Rajoneve Evropiane

Kryeministri Sali Berisha priti dje në një takim, një delegacion të Asamblesë së Rajoneve Evropiane (AER), të kryesuar nga Sekretari i Përgjithshëm i AER-së, zotin Pascal Goergen. Z. Goergen, shprehu kënaqësinë të shikonte se Shqipëria po ecën drejt konsolidimit të politikave rajonale dhe përgatitjes me konceptet evropiane të strukturës rajonale. Misioni i Asamblesë së Rajoneve, tha ai, lehtësohet mjaft, kur politikat e qeverive ndaj rajoneve synojnë forcimin e bashkëpunimit midis tyre. Kryeministri Berisha tha se zhvillimi rajonal përbën një prioritet dhe qeveria e vlerëson atë, me rëndësi të posaçme, për të afruar politikat e qeverisë me kërkesat e qytetarëve dhe të komuniteteve lokale dhe si një mjet i fuqishëm në përpjekjet për zhvillimin ekonomiko-social dhe kundër varfërisë. Kryeministri theksoi se përpjekjet janë të vazhdueshme për të forcuar rolin e autoriteteve rajonale dhe krijimin e kushteve e kapaciteteve administrative për thithjen e fondeve në kuadrit e programit të IPA-s. Modeli ynë rajonal ka dhënë rezultat, por ne synojmë konsolidimin e këtij modeli. Tashmë, në këtë kohë krize ekonomike evropiane e botërore, qeverisja rajonale, nënvizoi Kryeministri, merr përparësi për vetë dinamikën dhe gjenerimin e burimeve në njësitë vendore dhe rajonet.
Zoti Goergen shprehu mbështetjen e AER-së në zhvillimin e konsolidimin e këtyre politikave, përmes rritjes së bashkëpunimit dhe shkëmbimit të eksperiencave.
Shqipëria, tha ai, është në rrugën e integrimit evropian dhe kjo, padyshim, është një arsye më shumë, për të besuar në të ardhmen e rajoneve shqiptare.