Franca nën alarmin për terrorizëm

Presidenti i Francës, Nicolas Sarkozy, ka vënë rajonin jugperëndimor të vendit nën alarm të nivelit të lartë terrorist, pas sulmeve të së hënës në shkollën hebraike, të cilat kanë lënë të vrarë katër persona.

Në komentet e tij publike, Sarkozy ka thënë se duket qartë se ngjarja në qytetin e Toulousit ka qenë e natyrës anti-semitike.

Ai po ashtu ka thënë se beson që i njëjti sulmues ka qenë përgjegjës edhe për të shtënat e javës së kaluar, që kanë lënë të vdekur tre ushtarë francezë.

Të hënën në Toulous janë vrarë katër persona, në mesin e tyre tre fëmijë.

Kryeministri izraelit, Benjamin Netanyahu, i ka quajtur vrasjet “të neveritshme”.

Autoritetet izraelite kanë njoftuar se katër viktimat do të varrosen në Izrael.

Viktimat janë identifikuar si Rabi Jonatan Sandler, 30 vjeç, dy djemtë e tij, Gabriel dhe Arieh, të moshës 4 dhe 5-vjeçare, dhe Miriam Monosnego, vajza e drejtorit të shkollës, e moshës 7-vjeçare.

Në ndërkohë, një gjueti e vërtetë, më e madhja në historinë e fundit të Francës, po zhvillohet në këtë vend pas ngjarjes në Toulouse.