Fshati Xhyrë në izolim total, shembja e urës mbi Shkumbin alarmon autoritetet dhe kërkon reagim urgjent

Fshati Xhyrë, në Njësinë Administrative Hotolisht të Bashkisë Librazhd, po përballet prej mëngjesit të sotëm me një situatë të rëndë emergjente, pasi ura kryesore që e lidhte me rrugën kombëtare është shkatërruar plotësisht nga prurjet jashtëzakonisht të mëdha të lumit Shkumbin.

Rënia e këmbës qendrore të urës, e vendosur në mes të shtratit të lumit, ka shkaktuar dëmtimin dhe shembjen e strukturës, duke bllokuar menjëherë çdo lloj lëvizjeje. Rrjedha e fuqishme e ujit, e nxitur nga reshjet intensive dhe prurjet e pazakonta të ditëve të fundit, e ka bërë të pamundur rezistencën e urës ndaj goditjes së vazhdueshme, duke e kthyer situatën në një rrezik serioz për sigurinë publike.

Që në orët e para, emergjencat civile dhe policia kanë ndërhyrë duke bllokuar me blloqe betoni hyrjet, vendosur sinjalistikën e nevojshme dhe ndaluar qarkullimin e automjeteve e këmbësorëve, për të shmangur çdo incident të mundshëm.

Izolimi i banorëve dhe ndërprerja e procesit arsimor Pas shembjes së urës, Xhyra është izoluar plotësisht. Banorët nuk kanë asnjë mundësi komunikimi ose lëvizjeje drejt zonave të tjera, ndërsa ndikimi i kësaj situate ndihet veçanërisht tek fëmijët dhe familjet e tyre. Nxënësit e shkollës 9-vjeçare kanë mbetur pa mësim, pasi mësuesit nuk kanë mundur të hyjnë në fshat për shkak të ndërprerjes së lidhjes rrugore. Ky izolim i menjëhershëm ka shkaktuar shqetësim të madh, sidomos në një moment kur reshjet e ditëve të fundit kanë rritur rreziqet në shumë zona të vendit.

Komuniteti i fshatit Xhyrë, thirrje për ndërhyrje urgjente Autoritetet vendore dhe strukturat e emergjencave civile ndodhen në terren, duke monitoruar situatën dhe vlerësuar masat e menjëhershme që duhen ndërmarrë. Rikthimi i aksesit për banorët, garantimi i sigurisë dhe vendosja e një rruge alternative janë tashmë prioritete urgjente.

Shembja e urës së Xhyrës është një sinjal i fortë për domosdoshmërinë e investimeve në infrastrukturën mbrojtëse dhe në sistemin rrugor, sidomos në zonat ku lumenjtë paraqesin rrezik të lartë gjatë stinës së reshjeve. Ngjarja kërkon reagim të koordinuar dhe të shpejtë, për të garantuar të drejtën bazë të lëvizjes dhe sigurinë e banorëve të Xhyrës, të cilët sot kanë mbetur të shkëputur nga pjesa tjetër e territorit.

/rtsh.al/