Fusnota është kalimtare!

Zëvendësministri i Punëve të Jashtme, Petrit Selimi, ka deklaruar se Republika e Kosovës nuk mendon të përfaqësohet përgjithmonë me fusnotë në takimet rajonale. “Ne nuk e kemi ndryshuar emrin. Po ashtu, në marrëveshje thuhet qartë se bëhet fjalë për zgjidhje të përkohshme”, ka deklaruar Selimi për Agjencinë austriake të lajmeve, DPA.

Edhe pse marrëveshja nuk ka sjell rezultate të kënaqshme në takimet e para rajonale, (një ditë më parë në Beograd u largua delegacioni i Kosovës, ndërsa në Sarajevë, ai i Serbisë), Selimi ka thënë se fusnota është një e arritur pozitive.

Marrëveshja, sipas tij, ka sjellë tri përparësi: 1) Kosova mundet të flasë vet, pa praninë e UNMIK-ut, në takimet rajonale; 2) Kosova mund të jetë pjesëmarrëse e marrëveshjeve shumëpalëshe, shembull kur bëhet fjalë për ndërtimin e hekurudhave, tregtinë apo sigurinë e kufijve; 3) Marrëveshja i ka dhënë orientim të qartë Kosovës drejt Bashkimit Evropian.

Selimi ka kritikuar edhe vendimin e Serbisë për të shpallur zgjedhjet lokale edhe në Kosovë. “Është provokim i Serbisë, dhe natyrisht është absolutisht i papranueshëm”, ka thënë Selimi duke shtuar se “kjo është në kundërshtim të asaj që kërkon Bashkimi evropian nga një kandidat”.

Lidhur me integrimit e veriut të Kosovës në institucionet vendore, Selimi ka thënë se është optimist, dhe se vetëm duhet kohë që serbët ta kuptojnë realitetin e ri të krijuar në Ballkan. “Ne nuk duam të nënshtrojmë serbët e veriut. Ata mund të fitojnë vetëqeverisjen sikurse edhe komunat tjera, dhe ne nuk do të impononim asgjë. Pra ata mund të jetojnë sikurse deri tani, vetëm se zëri i tyre do të dëgjohej edhe në Prishtinë”. /Telegrafi/