Futbolli ia prish punët Francës me Japoninë

Por, këto ditë ka ndodhur diçka e paimagjinueshme, që ka bërë të fillojë kriza diplomatike ndërmjet Francës dhe Japonisë, pas fitores së shënuar nga ‘Samurai’ me rezultat 1:0.

Faji është i gazetarit të France 2, Laurent Ruquier, i cili duke dashur ta lëvdojë portierin e përfaqësueses japoneze, Eiji Kawashima, protagonist i ndeshjes, e ka paraqitur përmes një montazhi me katër duar, duke atribuuar në mrekullinë gjenetike të ‘efektit Fukushima’.

Në Japoni pas këtij rasti është çuar pluhur i madh. Osamu Fujimura, zëvendëskryeministër, nuk e ka pritur aspak mirë këtë fotografi të montuar.

“Është vërtet e papranueshme dhe pa kuptim. E kemi shprehur pakënaqësinë tonë dhe një protestë formale ndaj France 2. Ky montazh i ka ofenduar njerëzit e goditur nga fatkeqësia”, ka thënë ai.

Në këtë rast ka ndërhyrë edhe ministri i sportit, Makiko Tanaka. “E tërë kjo ka të bëjë me mungesë sensibilizimi. Shumë njerëz janë goditur nga fatkeqësia, nuk e di se çka ka për të qeshur dhe bërë shaka këtu”, tha ai.

Te japonezët plaga është ende e hapur. Gjatë marsit, një termet kishte shkaktuar cunamin, që kishte pasuar me eksplodime në centralin nuklear të Fukushimas. Nga kjo tragjedi kishin humbur jetën 18 mijë njerëz.