GAZË – Të paktën 15 të vdekur pas sulmit izraelit në Beit Lahia

TEL AVIV, 26 qershor /ATSH-DPA/- Pesëmbëdhjetë persona u vranë gjatë një sulmi izraelit në një ndërtesë në Beit Lahia në veri të Rripit të Gazës, raportuan sot burimet shëndetësore dhe agjencia e mbrojtjes civile e kontrolluar nga Hamasi.

Raportet i referohen shtëpisë së një familjeje në qytet, i cili shtrihet në veriun e largët të Rripit të Gazës, afër kufirit me Izraelin.

Informacioni nuk mund të verifikohet në mënyrë të pavarur dhe Forcat e Mbrojtjes të Izraelit (IDF) thanë se po kontrollonin raportet.

IDF raportoi operacione të vazhdueshme kundër grupit islamik palestinez Hamas në Rafah, në jug të Rripit të Gazës.

Agjencia e mbrojtjes civile të Rripit të Gazës tha sot se ekipet e saj kishin shpëtuar 13 persona nga një ndërtesë në qytetin e Gazës që ishte goditur nga një sulm izraelit.

IDF gjithashtu raportoi alarme për sulm ajror në dy qytete pranë kufirit me Rripin e Gazës në përgjigje të raketave. Mediat izraelite raportuan se një raketë e lëshuar nga Rripi i Gazës ishte kapur. Nuk pati raportime për viktima.

Sipas autoritetit shëndetësor të kontrolluar nga Hamasi, të paktën 37 718 njerëz janë vrarë në Rripin e Gazës që nga fillimi i luftës dhe 86 377 të tjerë janë plagosur.

Shifrat nuk bëjnë dallim mes luftëtarëve dhe civilëve.

Lufta shpërtheu pas sulmeve të ngritura nga Hamasi dhe grupet e tjera ndaj Izraelit më 7 tetor. //a.i/