GJERMANI – Niveli i alarmit të sigurisë ulet sërish në bazën ajrore të NATO-s

GJERMANI, 23 gusht /ATSH-DPA/- Niveli i alarmit të sigurisë për bazën ajrore të NATO-s Geilenkirchen në Gjermaninë perëndimore është ulur sërish, më pak se 24 orë pasi autoritetet forcuan sigurinë në bazë pas raporteve të inteligjencës për një kërcënim të mundshëm.

“Niveli i alarmit të sigurisë në bazën ajrore u ngrit të enjten në Charlie – niveli i dytë më i lartë –  si masë paraprake, por u ul përsëri në nivelin Bravo + sot pasdite”, sipas një zëdhënësi të bazës ajrore.

Kjo do të thotë se masat paraprake të sigurisë në aeroport janë kthyer në të njëjtin nivel që ka qenë në fuqi – që nga fillimi i pushtimit në shkallë të plotë të Ukrainës nga Rusia.

Zëdhënësi i bazës ajrore tha se vendimi për të ngritur nivelin e sigurisë të enjten në mbrëmje ishte bazuar në informacionin e inteligjencës që tregonte një kërcënim të mundshëm.

Në termat e NATO-s, niveli i sigurisë Charlie do të thotë se ka pasur një incident ose ka prova që sugjerojnë një gjasë të lartë për veprime terroriste kundër aleancës.

Ai refuzoi të jepte ndonjë informacion të mëtejshëm në lidhje me natyrën ose rrethanat që lidhen me rritjen e sigurisë.

Megjithatë, ai hodhi poshtë spekulimet rreth fluturimeve të mundshme me dron në bazën ajrore.

Fluturimi mbi bazën është i ndaluar për avionët e paautorizuar dhe hapësira ajrore monitorohet nga afër.

“Si masë paraprake, 1600 punonjës në bazë u dërguan në shtëpi gjatë alarmit të shtuar, por operacionet e fluturimit në bazë nuk u ndërprenë”, tha ai.

Avionët e Sistemit të Paralajmërimit dhe Kontrollit Ajror (AWACS) ngrihen dhe ulen pesë ditë në javë në bazën ajrore të vendosur përgjatë kufirit gjerman me Holandën dhe afër Belgjikës. //a.i/